Budyšin (SN). Nowy slědźerski projekt „Typy pochadnych rěčow w přirunanju: hornjoserbšćina a pólšćina w Němskej“ startuje 1. septembra w rěčespytnym wotrjedźe Serbskeho instituta (SI). Němski slědźerski zwjazk DFG spěchuje třilětny slědźerski projekt, kotryž přewjedźe so zhromadnje z uniwersitu w Bochumje, z dohromady 785 500 eurami. We wobłuku projekta chcetej rěčespytnicy dr. Leńka Šołćic (SI) a prof. dr. Tanja Anstatt (uniwersita Bochum) sociolinguistiske kajkosće a wuwiće pólšćiny w Poruhrskej a hornjoserbšćiny we Łužicy přepytować. W hornjoserbšćinje steji wobchadna rěč w katolskej kónčinje w fokusu. Wosebitosć je, zo přirunujetej so wšelakej typaj mjeńšinowych rěčow: serbšćina jako rěč awtochtoneje „stareje“ mjeńšiny w Němskej a pólšćina jako rěč alochtoneje „młodeje“ mjeńšiny w Němskej. „Z projektom chcemy slědźenja k hornjoserbskej wobchadnej rěči w Serbskim instituće rozšěrjeć a skrućeć. Wuslědki chcemy zdobom do wědomostneho konteksta slědźenja k mjeńšinowym rěčam a rěčneje wariacije a změny stajić“, Šołćic zjima.