Smochćicy wospjet z jewišćom słowjanskeho, takrjec swójbneho swjedźenja
Smochćicy (SN/bn). Serbski ludowy ansambl a kubłanišćo swj. Bena stej minjeny kónc tydźenja pod hesłom „Słowakskej nocy“ lětuši Hudźbny swjedźeń Smochćicy wuhotowałoj. Dohromady je něhdźe 800 zajimcow zarjadowani pod hołym njebjom wopytało.
„Pokročujemy z hudźbnej jězbu po susodnych słowjanskich krajach a pokazamy dalšu fasetu wjelorakeho kulturneho žiwjenja Europy“, intendant SLA Tomas Kreibich-Nawka hosći pjatk powita, podšmórnywši „dołhu zhromadnu tradiciju ansambla a Słowakskeje“ a podźakowawši so předewšěm „swójbje Matiaško, kotraž je program rozsudnje sobu zestajiła“. Direktor kubłanišća Sebastian Kieslich wjeseleše so hladajo na „konkurenčne zarjadowanje w Mnichowje nad bohatej ličbu wopytowarjow“ a powita jako čestneho hosća biskopa na wuměnku Joachima Reinelta, „dźakowano kotremuž bu tule kubłanišćo-kulturnišćo wutworjene“.
