Paralympiske hry 2024 w Parisu su wčera ze zakónčacej swjatočnosću jimacy kónc namakali. Při tym staj paralympiskaj dobyćerjej płuwarka Elena Krawzow a tesakowar w jězdnym stole Maurice Schmidt němsku chorhoj do Stade de France njesłoj. Němska zakónči paralympiske hry w Parisu nimale mjez najlěpšimi dźesać narodami w medaljowym špihelu. Z 10 złotymi medaljemi, 14 slěbornymi kaž tež 25 bronzowymi docpě wubranka Němskeho paralympiskeho zwjazka 11. městno.

To zmóžnichu tež sylne wukony poslednje tři wubědźowanske dny. Cyłkownje dobychu tam hišće raz 16 medaljow. Najwuspěšniši dźeń bě sobota ze sydom medaljemi.

Blidotenisowa hrajerka Sandra Mikolaschek je sobotu njewočakowano najwjetši wuspěch swojeje sportoweje karjery swjećiła. W finalu w Parisu (klasa WS4) přesadźi so Düsseldorfčanka přećiwo prěnjej swětoweje lisćiny Borislavi Perić-Ranković ze Serbiskeje a wudoby sej złotu medalju.

Přez drohometal wjeselić móžeše so tež Lindy Ave. 26lětna běžeše sobotu w finalu přez 400 metrow na třeće městno.