Peter Čačko z Bratislavy rozprawja za Serbske Nowiny

Politisku scenu kraja rozbudźi w awgusće wězo překwapjacy rozpad knježerstwoweje koalicije štyrjoch stron, ale jeno chwilku. Tak spěšnje kaž bě kriza přišła, bě tež zaso nimo. Dokelž su SN wo tymle podawku nadrobnišo rozprawjeli (hlej SN čo. 162) inkl. jeho wuslědka, zo předsyduje premier Robert Fico nětko koaliciji třoch stron, móžu sej dalše wuwjedźenja k temje zalutować.

W minjenym měsacu bě so zwěsćowarnja měnjenjow Stem/Mark mjez słowakskimi ludźimi wobhonjała, čeho so najbóle boja. Při tym so wukopa, zo maja před financnymi ćežemi a chudobu wjetši strach hač před terorizmom, sćěhami migraciskeje krizy abo ćežkim schorjenjom. W tymle zmysle je so nic mjenje hač 69 procentow woprašanych wuprajiło. Chudoby so předewšěm ludźo z nišim zdzěłowanjom kaž tež žony bóle strachuja hač mužojo. Dobra třećina słowakskich wobydlerjow – konkretnje 37,5 procentow a mjez nimi hłownje młodźi ludźo do 29 lět – wšak wěri, zo so jim financna situacija polěpši.