Pólska wopory lětadłoweje katastrofy w Smolensku wopominała

Waršawa (dpa/SN). Ze wšelakimi zarjadowanjemi je Pólska wčera wopory lětadłoweje katastrofy w ruskim Smolensku před sydom lětami wopominała. Při zražce knježerstwoweje mašiny dnja 10. apryla 2010 bě 96 pasažěrow žiwjenje přisadźiło, mjez nimi tehdyši prezident Lech Kaczyński, dwójnik nawody knježerstwoweje strony Prawo a sprawnosć (PiS) Jarosława Kaczyńskeho.

Wčera rano zhromadźichu so čłonojo knježerstwa zhromadnje z wobydlerjemi k wopomnjenskemu apelej před knježerstwowym palastom we Waršawje. Tam předčitachu mjena wšitkich woporow. Kaczyński a ministerska prezidentka Beata Szydło połožištaj kwětki před wobraz znjezboženeho prezidenta a jeho mandźelskeje.

Prezident Andrzej Duda wopyta row prezidentskeho porika na Krakowskim Wawelu. „To njebě někajke njezbožo. To bě katastrofa, při kotrejž je Pólska elitu politiskeho swěta a zjawneho žiwjenja přisadźiła“, Duda rjekny. Mašina prezidenta bě po puću na wopomnjenske zarjadowanje w Ruskej. W hustej kurjawje lětadło znjezboži.