Pólska debatuje znowa wo reparacijach z Berlina za wójnske škody

Waršawa. Na chětro spektakularne wašnje su tydźenja w Pólskej róčnicu Waršawskeho zběžka w Druhej swětowej wójnje wopominali. Do zahajenja koparskeje hry mjez Legiju Waršawu a mustwom z Kazachstana w Narodnym stadionje stworichu přihladowarjo hoberski wobraz z lětoličbu 1944 w pólskimaj čerwjeno-běłymaj barbomaj. W srjedźišću steješe wobraz němskeho oficěra, kiž z pistolu na hłowu pólskeho hólca měri. Nimo toho bě transparent w jendźelskej rěči připrawjeny, kotryž na to skedźbni, zo su němscy okupanća za čas zběžka 160 000 pólskich ciwilistow morili, mjez nimi tysacy dźěći. Waršawski zběžk bě so 1. awgusta 1944 zahajił a traješe 63 dnjow. Němske jednotki jón přewšo brutalnje pobichu.