Dojednanje z Čěskej brunicoweje jamy dla za Pólsku droha naležnosć

Waršawa. Njedawne trochu překwapjace dojednanje mjez Pólskej a Čěskej Turówskeje brunicoweje jamy dla su ludźo z wolóženjom registrowali. Wšako skónči so tak lěta trajace rozestajenje, kotrež bě samo Europske sudnistwo zaběrało. Wosebje w Čěskej su přewšo zwjeseleni, kaž to ministerski prezident Petr Fiala rjekny. Porno tomu Polacy poněčim wopřimnu, zo budźe zrěčenje za jich kraj přewšo droha naležnosć.

Hnydom po dojednanju bu znate, zo płaći Pólska Čěskej 45 milionow eurow za nastate škody w přirodźe, předewšěm dnownu wodu nastupajo. Nimo toho dyrbi Pólska hoberski a ze štomami zwosadźany nasyp podłu mjezy natwarić, zo bychu wobydlerjo na čěskim boku lěpje přećiwo harje a prochej škitani byli. Zo njeby dnowna woda kaž dotal do Pólskeje ćekła, dyrbi Pólska zdobom wulku podzemsku murju twarić. Za to ma cyłe lěto chwile.