W poměru k Ukrainje jewja so ćmowe mróčele

Waršawa. Spočatk lěta 2023 je pólsko-ukrainski poměr chětro poćeženy. Njedźelu, 1. januara, je Najwyša rada (parlament) Ukrainy 114. narodniny Stepana Bandery – swojeho narodneho rjeka – wopominała, kiž symbolizuje tam zdobom spjećowanje přećiwo Ruskej a agresiwnej politice jeje prezidenta Wladimira Putina. Pomniki Bandery, po nim pomjenowanje dróhi, zarjadnišća a naměsta widźiš předewšěm w zapadnej Ukrainje, kaž w Lwiwje, Kijewje a Odessy.

Knježerstwo Pólskeje a Polacy sami njemóža a nochcedźa přiběracy kult wokoło Stepana Bandery připóznać. Bě dźě wón wjednik narodneho wuswobodźenskeho hibanja a iniciator zběžkarskeje armeje Ukrainy UPA. Jeje jednotki nadpadowachu w lětach 1941 do 1944 dźěle Sowjetskeho zwjazka (ZSSR), ale tež Pólskeje, zo bychu zwoprawdźili són Bandery wo njewotwisnej a swobodnej Ukrainje. UPA je w tym času něhdźe 100 000 wuchodopólskich wobydlerjow moriła. Hižo 1933 bě Bandera sowjetski konsulat we Lwiwje a 1934 pólskeho nutřkowneho mi­nistra Bronisława Pierackeho nadpadnył.