Čěski prezident Miloš Zeman dźensa swoje zastojnstwo přepoda

Praha (SN/MkWj). W čěskej stolicy Praze je dotalny prezident Miloš Zeman dźensa swoje zastojnstwo nowowuzwolenemu prezidentej Petrej Pavelej přepodał. 61lětny Pavel bě so kónc januara w rozsudnym kole prezidentskich wólbow přećiwo bywšemu ministerskemu prezidentej Andrejej Babišej přesadźił. 78lětny Zeman bě wot lěta 2013 prěni direktnje woleny prezident Čěskeje republiki.

W rozmołwje z čěskim powěsćowym sćelakom CNN Prima News bě so Zeman minjenu njedźelu za to wuprajił, kompetency najwyšeho statneho zastojnstwa čłonskeho kraja EU a NATO rozšěrić. Tak měł prezident mjez druhim prawo dóstać, parlamentej swójske naćiski zakonjow k wothłosowanju předpołožić. Nimo toho měli so móžnosće prezidenta sylnić, ze swojim wetom nowym zakonjam zadźěwać móc.

Za čas swojeho zastojnstwa bě so Zeman stajnje prócował, styki k Chinje a – hač do spočatka wójny w Ukrainje – tež k Ruskej spochi dale wutwarić.