EU sej wot Pólskeje žada dwělomnu praksu w konsulatach wujasnić
Waršawa. Njewšědny skandal wizumow dla je w pólskej towaršnosći tele dny jara prezentny a so wšědnje dale rozšěrja. Naležnosć je knježacej narodno-konserwatiwnej stronje PiS runje w tuchwilnym wólbnym boju přewšo njepřijomna. Tomu wotpowědnje we Waršawje oficialnje spytaja aferu złahodnić.
Wotkryli su problem njewoprawnjeneho wudawanja wizumow njedawno w USA. Policistam běchu na kruće wobstražowanej mjezy Mexika ludźo napadnyli – wočiwidnje z arabskich krajow –, kotřiž chcychu so z wizumom Pólskeje republiki do USA dóstać. Tamniši zamołwići su so na to telefonisce na swojich kolegow we Waršawje wobroćili. Poněčim so wukopa, zo běchu sej ludźo w arabskich krajach na konsulatach Pólskeje tajki wizum kupili. Rěč je wo 5 000 dolarach za dokument, kotryž mějićelej dowola do Schengenskeho ruma EU a tak zdobom do wšeje Europy zapućować. Lědma štó z wobsedźerjow tajkeho wizuma ma wotpohlad w Pólskej wostać, wšako su mjezy EU we wobłuku Schengenskeho ruma wotewrjene.