„Zelena mjeza“ zbudźa razne reakcije Waršawskich politikarjow

Waršawa. Poprawom dobry poměr mjez Pólskej a Ukrainu je so minjene tydźenje raznje změnił. Njedawne připowědźenje ministerskeho prezidenta Mateusza Morawieckeho, zo njebudźe Pólska Ukrainje hižo žane brónje dodawać a žane ukrainske žito importować, bě chutnje měnjene. Tole su mjeztym tež w Ukrainje spóznali a wotmołwili, zo přichodnje wo pólski sad a zeleninu wjace njerodźa. Hospodarsce drje njebudźe to pólskim ratarjam wulki šok, kaž před lětami, jako Ruska import pólskich jabłukow zakazowaše. Najebać to je najnowše wuwiće znamjo dalšeho přiwótřenja poměra mjez krajomaj.