Pólski prezident Andrzej Duda nowych ministrow spřisahał

Waršawa. Polakam skića tele dny politiske dźiwadło, kotrež tam w tajkej formje dotal hišće dožiwili njejsu. Dźiwnostka traje dalšej dwaj tydźenjej. Ministerski prezident Mateusz Morawiecki je minjenu póndźelu wotpowědnje swojemu zastojnstwu nowe knježerstwo kraja předstajił. Prezident Andrzej Duda, kiž wšak bě premierej wotpowědny nadawk dał, je nowy kabinet 18 ministrow w swojim palaisu spřisahał. W gremiju je dźewjeć žonow. Předsyda dotal knježaceje narodno-konserwatiwneje strony PiS Jarosław Kaczyński bě čłonow kabineta wuzwolił, kaž sam rjekny. Hordźe pokaza wón na „młode wobliča“ w rjadach nowych ministrow. Wšitkim ludźom je jasne, zo so wo ryzy inscenaciju jedna. Po wustawje Pólskeje dyrbi Morawiecki po dwěmaj ­tydźenjomaj, 11. decembra, dźěławosć knježerstwa rozłožić a prašenje dowěry stajić. Dokelž pak ma opozicija tam po njedawnych wólbach přemóžacu wjetšinu mandatow, nowy kabinet wěsće přepadnje. Toho je sej tež Morawiecki wědomy, kiž widźi za sebje hišće „šansu dźesać procentow“.