Posledni akt pólskeho knježerstwa přichodnu póndźelu w sejmje
Waršawa. Polacy hotuja so póndźelu na wusahowacy podawk, kiž je někotremužkuli „politiske kino“ – we woprawdźitym zmysle słowa. W parlamenće we Waršawje schadźuje so sejm, zo by posledni kapitl wot lěta 2015 skutkowaceho narodno-konserwatiwneho knježerstwa strony PiS zakónčił. Do toho pak dyrbja wšitcy hišće posledni akt dźiwadła dožiwić. Derje wědźo, zo nima najmjeńšeje šansy, chce dotalny ministerski prezident Mateusz Morawiecki swoje nowe knježerstwo předstajić, kiž bě po njedawnych wólbach w nadawku prezidenta Andrzeja Dudy zestajał. Po wustawje ma Morawiecki zapósłancam prašenje dowěry stajić. Přemóžaceje wjetšiny opozicije dla je zwoprědka jasne, zo nowy kabinet přepadnje a zo so doba PiS tuž kónči. Najebać to chce PiS swój program rozłožić. Morawiecki wě, što je wón stronje dołžny, kotraž bě jemu zastojnstwo dała.
