Marek Krawc rozprawja wo aktualnje rozjimanych temach w Čěskej

Praha. Tři złote a dwě bronzowej medali – to je wunošk čěskich sportowcow na olympiskich hrach w Parisu. Minjenu sobotu mytowachu kanutu Josefa Dostála ze złotom za swój wukon w kajaku na ­čarje 1000 metrow. To je prěnje złoto za pjećkróćneho mištra swěta, kiž bě hač dotal na třoch olympiskich hrach tři bronzowe a jednu slěbornu medalju dobył. Hižo pjatk bě sej Čecha Martin Fuksa w kanadieru, tohorunja na čarje jednoho kilometra, złoto za swój kraj wuwojował. A tež tenistaj Tomáš Macháč a Kateřina Siniaková staj jako dwójka ze złotej medalju přewšo wuspěšnaj byłoj. Bronzowej medali běštej sej čěske tesakowanske mustwo a mjetarka hlebije Nikola Ogrodníková wjace hač zasłužiłoj. Přiwšěm su wuslědki čěskeho olympiskeho teama skerje přesłapjace. Na zašłych hrach w Tokiju radowachu so olympionicy nad jědnaće medaljemi – štyri złote, štyri slěborne a tři bronzowe. Do wotjězda na najwjetši sportowy swjedźeń swěta w Parisu bě sej Martin Doktor, šef čěskeje ­wubranki, přał: „Dźesać medaljow – to by wulkotne było.“