Marek Krawc rozprawja wo aktualnje rozjimanych temach w Čěskej
Praha. Trajny dešć nižiny Boris bě přičina za wulku wodu w Čěskej a jeje susodnych krajow. Hižo minjeny štwórtk warnowachu meteorologojo a medije wobydlerjow wjacorych kónčinow před sylnymi dešćemi a z nimi zwisowacymi powodźenjemi. Wobydlerjo najwohroženišich městow a wsow mějachu so po pokiwach ekspertow a přihotowachu so na ćežki kónc tydźenja. Wšudźe pak njemóžachu strachej zadźěwać. Hižo sobotu wojowachu wobydlerjo wsy Višňová w Friedlandskim wuběžku přećiwo zahubnej wodźe rěčki Smědá. Wjes bě samo na wěsty čas dospołnje wot dźiwjeje rěki wobdata. Ale tež w dalšich regionach, wosebje w Jeseníkach a na sewjernej Morawje, wočakowachu ludźo po dešćikojtej soboće najhórše.
