Marek Krawc rozprawja wo aktualnje rozjimanych temach w Čěskej

Praha. W našej towaršnosći je dźensa samozrozumliwe, zo so žony kubłaja a zo dźěłaja. W 19. a 20. lětstotku pak dyrbjachu sej žony tute prawo wuwojować. Projekt „feministiska Praha“ skići ze swojej webstronu, z digitalnym planom města a pućowacej wustajeńcu móžnosć, sej wotkrywać městna, kotrež z emancipa­ciju žonow wot 19. lětstotka hač do połstatych lět minjeneho lětstotka zwisuja. „Emancipacija bě poprawom dźěl narodneho hibanja, kotrež ma swój započatk w lěće 1848. Žony mějachu so za feministki, běchu patriotiske, čěska rěč a čěske stawizny běchu jim přewšo wažne“, podšmórny Markéta Štěpánová, zastupjerka njestatneje organizacije Gender Studies. Wosebje w Praze, w bohatšich byrgarskich swójbach, njenošachu so jenož žony, ale tež mužojo z emancipato­riskimi mysličkami. Žadachu sej na přikład prawo na kubłanje holcow.