Marek Krawc rozprawja wo aktualnje rozjimanych temach w Čěskej

Praha. W minjenym tydźenju třěleše ­Čěska swój najwjetši satelit, kotryž rěka SATurnin-1, do swětnišća. Jeho daty maja zakitowanju a wěstoće susodneho kraja słužić. Satelit, kotryž ma stajnje zemju fotografować, njeje wotwisny wot technologije z wukraja. Raketa Space X Falcon-9 z USA sćeleše minjenu wutoru ­satelit do swojeje wobkružneje čary. Tři dny pozdźišo předstajichu zastupjerjo instituta Research Test and Aerospace ­Institute w nadawku zakitowanskeho ministerstwa tutu technisku připrawu nowinarjam w Praze. „Hač dotal njemějachmy tajke wukonliwe satelity“, praješe generalny direktor instituta Josef Kašpar. „Připrawa budźe nam dokładne daty dodawać, kotrež su za naš kraj jara wažne“, je sej Kašpar wěsty.