Statnicy z 55 krajow wuswobodźenje lěhwa Auschwitz wopominali

Oświęcim. Wopominanje holocausta składnostnje 80. róčnicy wuswobodźenja zaničowanskeho lěhwa Auschwitz zaběra w medijach Pólskeje wusahowace městno. Při tym njezłožuja so jenož na ofi­cialne rozprawnistwo, ale wěnuja so tež čłowjeskej, emocionalnej runinje. Cyle w tym zmysle běchu zamołwići w bywšim němskim nacionalsocialistiskim lěhwje Auschwitz wopominanske zarjadowanje přihotowali. Hoberski stan za prošenych hosći steješe runje na tym městnje, hdźež mějachu za čas Druheje swětoweje wójny ćahi ze zawlečenymi ludźimi ze wšeje Europy swoje poslednje zastanišćo. Na rampje běchu oficěrojo němskeje SS nablaku rozsudźili, štó smědźeše hišće wěsty čas w hoberskim lěhwje barakow žiwy być a štó dyrbješe so hnydom na dwaj kilometraj dołhi puć do płunowych komorow podać. Po­trjecheni běchu wosebje Židźa, Sintojo a Romojo, maćerje, dźěći, stari ludźo.