Wadi-al-Natrun (B/SN). Zastupnicy koptow a ortodoksnych wěriwych zetkachu so po lětdźesatkach a wuměnichu swoje nahlady. Přezjedni sej woni su, zo wotpokazaja jenakosplažne wjazby a jich žohnowanje. Koptisko-ortodoksna a bycantinsko-ortodoksna cyrkej potwjerdźištej swoju poziciju w ekumeniskim dialogu a nadźijeja so na dojednanje z Vatikanom wo zhromadny termin swjedźenja jutrow.

Konflikty wotputać

Berlin (B/SN). Składnostnje swětoweho měroweho dnja zetkachu so 21. septembra načolni zastupjerjo rozdźělnych nabožinow k zhromadnemu modlenju za měr w Berlinje. Nimo měšnikow třoch křesćanskich nabožinow wobdźělichu so židowski rabi, muslimski imam a zastupjerjej nabožiny bahai a buddhistow.

Namołwa k lutowanju

Vatikan (B/SN). Swjaty stoł z wjace hač 2 000 přistajenymi we Vatikanje zwěsći loni dołh něhdźe 80 milionow eurow. Bamž Franciskus je nětko 236 kardinalow naležnje k wjetšej zlutniwosći namołwjał, prajo: „Prošu was tutón nadawk ze zmužitosću přiwzać a započate reformy z přeswědčenosću, loyalnosću a wulkomyslnosću podpěrać.“