„Młodźi dźiwi“ Viktorije Worklecy běchu so njedźelu na daloku jězbu do Lipska podali, a to jako jedne ze štyrjoch mustwow, kiž běchu so za regionalne wolejbulowe mišterstwo w starobnej skupinje U20 kwalifikowali. Hromadźe z hrajerjemi poda so zdobom něhdźe 50 fanow a fanowkow z Łužicy z busom sobu do Lipska. Tež wulki bubon mějachu sobu, tak zo móžachu swoje mustwo mócnje podpěrać.

Lipsk, Jena, Erfurt/Gotha – to běchu města, z kotrychž přećiwnicy Worklečanow pochadźachu. To pokaza hižo na to, kajki hoberski wuspěch to za dorost Viktorije bě, so jako druhi w sakskim mišterstwje za regionalne koło kwalifikować. Poradźi so młodym Worklečanam hišće wjetši dźiw, zaćah do zwjazkoweho finala?

Viktoria Worklecy –

L.E. Volleys 0:2 (22:25, 20:25)

W prěnjej hrě móžachu derje z mustwom L.E. Volleys sobu dźeržeć. Na kóncu dweju sadźbow pak so Lipšćenjo, kaž hižo w sakskim finalu, z 2:0 přesadźichu (25:22, 25:20). Hladajo na to, zo su L.E. Volleys lěto wob lěto faworit w tutym kole, je hižo wuspěch, přećiwo nim jenož snadnje podležeć. Tuž běchu Worklečanscy hólcy optimistiscy, zo sej přećiwo tamnymaj přećiwnikomaj dypki wudobudu.