Plijberg. Po tym zo běchu předwče­rawšim, wutoru, poslednje skupinske hry na tuchwilu so wotměwacej europeadźe w Korutanskej wuhrali, móžachu sej koparske mustwa wčera mału přestawku popřeć. Srjeda, pjaty oficialny dźeń lětušeho koparskeho turněra europskich narodnych mjeńšin, steješe cyle w znamjenju mjezsobneje wuměny.

Tak wotmě so wčera na hłownym torhošću w Plijbergu (Bleiburg) kulturny dźeń, na kotrymž předstaji wšitke 19 mustwow swoju rěč a kulturu bliže. Program zahajichu Korutanscy Słowjency z wustupom dźěći domoródneje ludoweje šule, kiž zanošowachu słowjenske kaž tež němske pěsnje. Na to slědowace kulturne přinoški wopřijimachu wideja, wšelke spěwy abo reje jednotliwych narodnych mjeńšin. Předewšěm stawizny w tym zwisku bliže wobswětlichu. Najmjeńša ludowa skupina na lětušej europeadźe su Cymbrojo z Italskeje. Jich rěč wobknježi jenož hišće něhdźe 400 do 1 000 ludźi. Najwjetšu ličbu přisłušnikow maja Němcy z Južneho Tirola. Po oficialnych datach je jich něhdźe 350 000.

Hdyž swjeća spočatk septembra w Ra­dworju 100 lět ST 1922 Radwor, potom budźe jubilejna hra Radworskich koparjow přećiwo BSG Chemiji Lipsk hižo w młódšich sportowych stawiznach zapisana. Što maja nimo toho w Radworju hišće planowane, wo tym je so Julien Glücklich z dołholětnym čłonom towarstwa ST 1922 Radwor Nicom Bušu rozmołwjał. Hižo styri lěta dźěła Ra­dworčan w předsydstwje, na dalše styri lěta je wón woleny.

Hdy sće započinali stolětny jubilej planować, kak a z kim?

N. Buša: Wězo smy hižo dołho wo tutym jubileju rěčeli, to pak we wěstych skupinach a tam jenož z wěstymi ludźimi. Konkretne plany nastachu w septembru 2021. Tam bu organizaciski komitej z pjeć čłonami wutworjeny. Mjeztym smy šesćo. Zetkamy so we wěstych wotstawkach. Tam potom wo aktualnych wěckach rěčimy, kiž dyrbimy runje organizować.

Kotre zarjadowanja su planowane a hdy budu so wone wotměć?

Serbscy koparjo su we wčerawšej poslednjej hrě skupinskeje fazy na europeadźe pola Korutanskich Słowjencow sylny wukon pokazali a so wěsće za štwórtkowne štwórćfinale kwalifikowali.

Zestawa: Boese – Bossens (77. G. Zahrodnik), Wałda, Woko, L. Zahrodnik (58. M. Zahrodnik). Hrjehor (64. Domaška), Krahl, Šuliš, Krawčik (59. Brühl), Kobelt, Bogusz (59. Rinca)

W Žitarej vsy (Sittersdorf) wotmě so za serbskich koparjow wčera popołdnju poslednja skupinska hra. Za serbsku wubranku bě to zdobom wažna hra wo kwalifikaciju za štwórćfinale, a to přećiwo mustwu Romow z Madźarskeje, kiž tworja zdobom najwjetšu etnisku skupinu w swojim kraju, něhdźe 200 000 přisłušnikow tam maja. Romojo běchu tohorunja, kaž łužiscy koparjo, wobě skupinskej hrě dobyli.

Wobaj cyłkaj startowaštej angažowanej do hry. Ta pak bě dominowana wot tójšto dwubojow a tež foulow, kotrež sudnik w hrě z někotrymi žołtymi kartami pochłosta. Trenar mustwa Romow dósta samo žołto-čerwjenu kartu.