Zestajała Marka Cyžowa

JULIJ 

Europeada – koparske mišterstwo europskich narodnych mjeńšin w Schleswigsko-Holsteinskej a Danskej (wot 29. junija hač do 6. julija 2024). Mjez 24 muskich a dźewjeć žónskich mustwow ze wšeje Europy běštej dwě serbskej mustwje; mužojo wobsadźichu 11. městno, žónske mustwo sedme městno. Blok 300 serbskich fanow wšěch generacijow napadny ze serbskimi chorhojemi, bubonami, drastami a pomolowanjemi w mjezwoču.

„Na spočatku je swětło“ – nowa saga Krabata zahorja. Lětsa hižo pjaty raz je rodźeny Wojerowčan a w Drježdźanach bydlacy a skutkowacy Michael Kuhn za lěćne předstajenje pod hołym njebjom na Krabatowym młynje w Čornym Chołmcu scenarij za Krabatowy kruch spisał a inscenował. Rezonanca, runje tež w serbskim publikumje, je jara pozitiwna. Prěni raz je Kulturny centrum Krabatowy młyn produkciju do swójskeju rukow wzał.