Koslowske „Žónske ze žabjaceho hata“ (Froschteichweiber) so z połnej paru na lětušu karnewalowu sezonu přihotuja. Katja­ Rauerowa wobdźěli so mjeztym 24. raz na Kulowskich póstnicach. Milenka Rječcyna je so z njej rozmołwjała.

Přeradźiće mi, w kotrym kostimje Was lětsa wumhladamy?

K. Rauerowa: Na žadyn pad. To je a wostanje naše potajnstwo – hač do soboty. Jenož tak wjele móžu rjec: Naše kostimy maja swój raz. Smy dźiwje a chcemy so wucychnować, smy žónske ze žabjaceho hata.

Kelko žonow so w skupinje angažuja?

K. Rauerowa: Lětsa wobdźěla so 13 žonow a młodych holcow na póstniskim přećahu sobotu a róžowu póndźelu w Kulowje. W cyłku pak smy samo 16. Holca, kotraž chce so nam přizamknyć, dyrbi znajmjeńša 16 lět stara być. Lětsa je tuž prěni raz moja dźowka Anastasia pódla.

Kak so poprawom na sezonu přihotujeće?

K. Rauerowa: Zetkamy so prěni raz 11.11., potom měsačnje jónu abo dwójce, a to stajnje pola druheje čłonki našeje skupiny. To mamy składnosć na kostimach dźěłać, bjesadować a sej dobre kuski popřeć. K tomu słuša wězo tež, zo sej wotpowědnje kostimej nowe hrónčka wumyslimy. Ně, tež te wam njepřeradźu.