Ptači kwas w kołću

Foće: Lea Kralec

„Uhu, što sym słyšała“ a mnohe dalše ptačatka swjećichu w „Chróšćan kołću“ lětuši ptači kwas. Hačrunjež su časy měnjawe, hawron ze sroku kwasuje.

Ale kak je k tomu dóšło? Tak hotowachu so wosebje dźěći kruš­winy, ale tež wšitcy druzy spočatk januara na ptači kwas. Štó ma njewjesta być? A rjenje bě widźeć, kak so wosebje holcy wjeselachu, na pisane fale, na narodnu drastu. Přihot w kołću; spěwać wo ptačkach a nawuknyć hrónčka, kiž ptači kwas wopisuja. Kwasna rejka njesmědźeše pobrachować.

Čim bóle so dźeń ptačeho kwasa bližeše, ćim njesćerpniše běchu tež dźěći. Hołk a tołk kaž w prawym kołću, hdźež so z pilnymi pčołkami jenož tak mjerwi. Rano mějachu hoto­wańče tuž ruce połnej dźěła. A tak buchu z holcow nje­wjesta, słónce a kwasni hosćo, wězo w krasnych šórcuchach a pi­sanych falach. Tež hólcy běchu swjedźensku drastu zwoblě­kani. Nawoženja měješe samo kwěćel za swoju njewjestu.

Skónčnje wotewza nawoženja swoju njewjestu a poda so na wulku kwasnu pěstowarsku hosćinu.

Foto: Dörthe RetschkePaslili, molowali a spěwali Na Krabatowej zakładnej šuli w Kulowje su ptači kwas z wul­kim wjeselom swjećili. Dźěći su na ptački předrasćene do šule přišli. We wšitkich rjadownjach su so z tutym nałožkom zaběrali. W rjadowni 1b su reju „Hanamarja“ zeznali. Najrjeńšo pak bě, jako su štučki rejowali. Kajke to juskanje! Samo hudźbu k tomu měja­chu, wo čož je so wučer hudźby knjez Nicolaides na šulskej chódbje starał. Potom su šulerjo pilnje ptačo­kwasne pyšenki paslili. Tež w druhich rjadow­njach su šulerki a šulerjo paslili, molowali a spěwali. Rja­dow­nja 1c w pisa­nych kostimach je dźeń z ptačokwasnym spěwom zahajiła. Rjadownja 3a je dźeń wuži­wała, wšelke reje nazwučować. Tak su so wótře smjeli, jako dyrbjachu balansować, štož při reji „Takle wjerćimy“ scyła tak lochko njeje. Wšitko pak derje zmištrowachu. Dale su šulerjo zhromadnje swačili, při čimž sydaše wězo słódka pječena sroka. Na kóncu mějachu wšitcy wulke wjeselo nad překwa­pjenku Kulowskeho měšćanosty Markusa Poscha, kiž bě do šule koš ze sadom a słódko­sće­mi pósłał. Dörthe Retschke

Kwasny ćah w Pančicach-Kukowje Dwurěčna pěstowarnja w Pančicach-Kukowje měješe lětsa tohorunja rjany ptačokwasny ćah, kotryž je braška Pepe nawjedował. Njewjesta Marlena a nawoženja Noah staj hordźe prědku kročiłoj. Foto: Feliks Haza

W bywšej kulturnej stolicy Europy Wrócławju su pozitiwne změny spóznajomne a dalše projekty planowane

Kóždolětnje přiwabja Wrócław syły turistow. „Kwětka Europy“, kaž bě britisko-pólski historikar Norman Davies město mjenował, ma cyle wosebite stawizny. Slědy měnjateje so narodnosće a kulturneje mnohotnosće su hač do dźensnišeho spóznajomne. W lěće 2016 bě metropola nad Wódru kulturna stolica Europy, z čimž je wona hišće bóle na so skedźbniła.