Po dwěmaj njezbožownymaj poražkomaj w cuzymaj halomaj pola prěnjeho a druheho wobwodneje ligi chcychu wolejbulisća Viktorije Worklecy posledni hrajny dźeń prěnjeje połserije doma na kóždy pad dypkować, zo bychu třeće městno w tabulce skrućili a z wulkim předskokom do adwentneje a hodowneje přestawki hić móhli.
Znowa pak běchu předznamjenja špatne. Swójbnych přičin dla pobrachowaštaj wobaj hłownaj nadběhowarjej. Po krótkej mustwowej rozrěči rozsudźichu so hosćićeljo na połne riziko, a to w zestawje z youngsterom Renéjom Schusterom. Tón bě mjenujcy naposledk solidne treningowe wukony pokazał. Kapitan Ludwig Eckert přewza poziciju wonkowneho nadběhowarja. W tej zestawje mustwo hišće ženje hromadźe hrało njeje, štož bě wězo zwažliwe předewzaće. Kak pak Worklečenjo situaciju zmištrowachu, bě sensacionelne.
Viktoria Worklecy 92 – MSV Budyšin II 3:1 (25:15, 23:25, 25:20, 25:18)
