Před mnohimi přihladowarjemi a wulkotnej blidotenisowej atmosferu hrajachu srjedź februara w domjacej hali hosćićeljo z Worklec a mustwa z Budyšina, Kamjenca a Čerwjenych Noslic wo wokrjesny pokal. Po něhdźe 3,5 hodźinach najlěpšeho blidotenisa, z napjatymi duelemi a zdźěla spektakularnymi přihrawkami bulow w modusu kóždy přećiwo kóždemu běchu Worklečanscy sportowi přećeljo Roman Straube, Michał Mikławšk a Stephan Mith z jokerom Milanom Lukašom dobyćerjo turněra. Ze sylnymi wukonami 4:1 přećiwo Čerwjenym Noslicam, 4:1 přećiwo Budyšinej a 4:0 přećiwo Kamjencej zakitowachu Worklečenjo swój lońši titul suwerenje. Kaž přeco běchu so zamołwići Viktorije wo ćělne derjeměće hrajerjow kaž tež přihladowarjow z kofejom a tykancom resp. piwom a kołbaskami postarali.