Spočatk februara běchu w Kamjenicy sakske wolejbulowe mišterstwa starobneje klasy U18. Nimo mustwow L.E. Volleys I a VC Drježdźany kwalifikowachu so hišće ST Viktoria Worklecy 92, L.E. Volleys­ II, Drježdźanske ST 1953, kaž tež hosćićelski Kamjeničanski WSV jako wotpowědny wobwodny mišter.

W předkole wuhrachu so zdźěla hižo napjate partije. Tak bě w skupinje B hač do poslednjeje hry hišće wšitko móžne. W połfinalomaj dobychu hrajerjo L.E. Volleys I přećiwo VC Drježdźanam a CWSV přećiwo Worklecam stajnje w dwěmaj sadźbomaj. W finalu přewahowaše pozdźiši dobyćer L.E. Volleys I, při čimž hólcy z Kamjenicy zmužiće dale wojowachu. Tež pohonjowanja publikuma motiwěrowachu wolejbulistow. Třeće městno wudoby sej VC Drježdźany. Wuznamjenjenje najlěpšeho hrajerja přijimaše Julius­ Roscher wot L.E. Volleys I.

Sylny wukon pokaza na krajnej runinje znowa Worklečanski dorost, kotryž sej pak bohužel jenož tak mjenowanu drjewjanu medalju za štwórte městno wudoby.

Kónčny staw

1. L.E. Volleys I

2. Kamjeničanski WSV

3. VC Drježdźany

4. ST Viktoria Worklecy

5. L.E. Volleys II

6. Drježdźanske ST

Před někotrymi tydźenjemi pobychu zastupjerjo Němskeje koparskeje ligi DFL w Choćebuzu, zo bychu materielno-techniske wuměnjenja w LEAG Energijowym stadionje za pad postupa do druheje ligi pruwowali. Wuslědk posudźowanja bě poražacy. Tak wozjewi dospołnje přesłapjeny předsyda FC Energije Choćebuz Sebastian­ Lemke posudźowanje pruwowarjow DFL kónc februara: „Su nam jasnje wuwědomili, zo je naš stadion za druhu ligu njedosahacy, a zo njedóstanjemy licencu po našim ewentualnym postupje.“

Wopodstatnjeny tutón rozsud je, wšako žadaja w 2. lize mjez druhim sylnosć připrawow za swětło a za swětłomjetaki we wysokosći 1200 lux. Nimo to dyrbja wšitke městna za sedźenje bjezwuwzaćnje třěchu měć. Tež medijowy wobłuk dyrbjeli rozšěrić, wuměnjenja za wrotowu techniku zawěsćić a ławki za narunanskich hrajerjow jasnje rozšěrić. Wšitke tele žadanja njemóža so z financneho etata nowačka třećeje ligi zaručić. Tuž wobroćichu so zamołwići na město Choćebuz a kraj Braniborsku. Próstwy wo eksterne spěchowanje njewostachu bjez wuslědka.

Lodowe mjedwjedźe Regensburg –

Łužiske lodohokejowe liški 0:3 (0:0, 0:1, 0:2)

Łužiske liški su pjatk wječor swoju wonkownu hru před 4 384 fanami w Regensburgu 3:0 dobyli. Wrotar Anthony Morrone pokaza při tym wurjadny wukon a swjećeše swoju druhu hru bjez přećiwnych wrotow w tutej sezonje.

Regensburg započa sylnje a nuzowaše liški do defensiwy. W spěšnej hrě pokazaštej wobaj defensiwnej rjadaj wurjadny wukon. Najlěpšu składnosć w prěnjej třećinje měješe Timo Kose, kiž we wosmej mjeńšinje puk snadnje nimo wrotow Morrona měrješe. Domjacy sadźachu dale na wutřěle ze wšěch pozicijow, zo bychu ćišć wysoko dźerželi. Ale bjez wrotow dźěše do prěnjeje přestawki.

Sokoł Ralbicy/Hórki –

TSV 1920 Połčnica 3:1 (3:1)

Zestawa domjacych: Schöne – Schultz, B. Heidorn, Matka, L. Heidorn (66. Šiman), Šewc, Gloxyn, Rachela (77. Hicka), Bejma (83. Bejmak), Domaška, Šnajder (60. Mikławšk)

Po zymskej přestawce startowachu Sokoljo na domjacym twjerdym hrajnišću do druheje połserije. Kónčna faza přihota pak njebě runjewon optimalna. Hra přećiwo Porchowej wupadny a nachwatansku hru w Ramnowje njemóžachu zymskeho wjedra dla přewjesć. Tak pobrachowaše wěsty rytmus.