ZFC Meuselwitz
– FSV Budissa Budyšin 0:4 (0:2)
Zestawa Budissy: J. Jakubov – Kolan, Klippel, (67. Pfanne), Patka, Kral, Hoßmang, Reher (85. Hansch), Rosendo (62. Hausdorf), Salewski, Walther
Po dobyću w Budyšinje přećiwo Viktoriji Berlin poda so regionalny ligist Budissa Budyšin na wonkownu hru, a to k ZFC Meuselwitz. Wobaj cyłkaj chcyštaj hru wězo dobyć. By-li so to hosćićelej poradźiło, by wón w tabulce Budyšanow přesćahnył. Tomu chcyše Budissa wězo zadźěwać. Prěnju składnosć k wrotam měješe za hosća Salewski, kotryž pak jenož wonkownu syć wrotow trjechi. Na to pospytaštaj so na tamnej stronje Krieger a Müller. Po wrotach Walthera (25.), bě přećiwnik nadobo chětro njewěsty. Bě to dźeń nadběhowarja Walthera. Jeho prěni wólny kop šmórny snadnje wyše wrotow, dalši pak přetwori wón k 0:2 (43.). Z tutym wuslědkom podaštej so mustwje do přestawki.