Do wolejbuloweho hrajneho dnja w sakskej klasy bě so jasne rozrjadowanje w tabulce pokazało. Štyri mustwa wojuja wo postup, dalši kwartet přećiwo zestupej. A runje dwaj z faworitow běštaj na prěnim adwentnym kóncu tydźenja přećiwnikaj prěnjeho wolejbuloweho mustwa ST Viktorije Worklecy. Žadyn lochki to chlěb! Hrožeše hrajny dźeń bjez dypkow. Ale Worklečenjo běchu bjezstrašni.

ST Viktoria Worklecy –

Póst ST Drježdźany 3:1

(26:24, 25:20, 20:25, 26:24)

Z tutym nastajenjom nastupichu Viktorianorojo prěnju hru přećiwo póštownikam z Drježdźan. Worklečanam poradźi so hač do 22:22 hru dospołnje wurunanu dźeržeć. Kóždy pospyt hosći, so wotsadźić, bu promptnje z přećiwniskim nadběhom wotmołwjeny. Na kóncu prěnjeje sadźby pokazachu domjacy potom jara sylne čuwy. Prěni sadźbowy bul móžachu hosćo hišće wotwobarać, tola w druhim pospyće dobychu skónčnje 26:24.