Do srjedź wulkeje horcoty a suchoty je dyriło bjez wochłódźenja wulke njewjedro – powěsć wo tym, zo sej energijowy koncern Vattenfall swoje za lěto 2014 hižo płaćene přemysłowe dawki wot gmejnow a městow wróćo žada.
Jednohłósnje słyšeć běštej přesłapjenje a zadwělowanje wjesnjanostow kaž tež měšćanostow, kotřiž maja nětko nadawk, komuny z mjenje pjenjezami dale wjesć.
Rjany són wo wěčnym kužole brunicy zda so wusonjeny być. Hnydom wołaja do Berlina a sej žadaja, zo měli so ći tam horjeka wo to starać, wurunać pobrachowace pjenjezy, wšako su wone wina, zo kužoł bórze zaprahnje.
Přiwšěm dochody z přemysłoweho dawka z hórnistwa hižo lěta spaduja. Loni hišće njebě žanych politiskich wobmjezowanjow wudobywanja wuhla. Vattenfall je samo rekordne mnóstwo 61,8 milionow tonow brunicy z łužiskeje zemje wurył, a ani centa njeje do kasow komunow šło. A tež tole loni bě: Braniborscy politikarjo wěšćachu dochody 40 milionow eurow za kraj a komuny z rozšěrjenjom jamy Wjelcej-juh a z milinarnju w Čornej Pumpje. Dochody su so rozpušćili kaž kur z wuhenjow milinarnje.