Na bazy wjele wobmyslenjow
Marko Šiman, zapósłanc CDU w Sakskim krajnym sejmje
Zasadnje njejsym za to, přichodnym generacijam nowy dołh napołožić, kotryž dyrbja wone potom wotpłaćić. Problemy Němskeje móžemy tež z mjeńšim zadołženjom zrjadować. Wažne pak tež je, projekty na dobro Łužicy zwoprawdźić a tak dźěłowe městna zachować. Klimowe zaměry do wustawy zapisać je njetrjebawše. Dnjowa politika njesłuša do zakładneho zakonja.
Elaine Jenčec, zapósłanča CDU w Sakskim krajnym sejmje
Je łoskoćiwa wěc, hladajo na přichodne generacije dołh w tajkej wysokosći brać. Swět pak je so změnił, hospodarstwo bywa słabše, a wójna w Ukrainje je wužadanje. Rozsudne je, zo so pjenjezy do transformacije inwestuja, nic do subwencijow. Knježerstwo ma hišće lěpje konkretizować, za čo srědki nałožuje.
Philipp Werš, sobustaw Budyskeho wokrjesneho předsydstwa CDU
Zapósłane (14.03.25)
Hagen Domaška z Drježdźan je měnjenja, zo fatalizm dale njepomha:
Njemóžu so dopomnić, zo su SN hižo raz legitimaciju statnych institucijow jako „podrytu“ pomjenowali, hačrunjež tam nacije a prawicarskoekstremni mandaty maja. Wona strona, kotrejež etiket ma so cyłemu Serbskemu sejmej nalěpić, je při wólbach zwjazkoweho sejma w hordych serbsko-katolskich gmejnach mjez 28 a 39 procentami hłosow dóstała. Znajmjeńša štyrjo z pjeć čłonow sakskeje Rady za serbske naležnosće buchu z hłosami tuteje strony woleni. Kelko ludźi w sobustawskich towarstwach Domowiny je prawicarskoekstremnych? To ženje njezhonimy, přetož za to trjebaš swobodne wólby.
Při tym je tola cyle jednore: Komuž so nětčiši sejmar*ka njehodźi, smě rady k přichodnym wólbam sam nastupić a to lěpje činić. Sym to sam činił a dźakuju so wšitkim, kotřiž su mje wolili. A ně, njebych to za cyniske měł, mi wjele zboža wupřeć. Zbožo móžemy wšitcy trjebać, dokelž jenož argumenty njedosahaja, hdyž su ludźo zatrašeni.
Zapósłane (13.03.25)
Theresia Kubašec z Radworja:
Listujo w starych čisłach Katolskeho Posoła namakach tutu zajimawostku: „Přećiwo mucham su najlěpše srědki łastojčki. Ratarjo w lěću skorža na wulku mnohosć muchow w hródźach, kotrež skót šaruja. Po wobličenjach zešlapa jedyn por łastojčkow w lěće wokoło 600 000 muchow. Jeli by so we wsy sto porow łastojčkow zasydliło, zniča tute za lěto znajmjeńša 60 milionow tutych wostudłych zwěrjatkow. Tohodla so tež kóždy bur wjeseli, hdyž na jeho dworje łastojčki sebi hněžko twarja.“
W Drobach, w Radworskej wosadźe, pak sej ludźo wjac rady nimaja wjele muchow dla a stajnje so praji, zo njeje to wina firmy, kiž tam wotpadki niči. Wjele zhromadźiznow a přepytowanjow su tohodla hižo přewjedli. Snano wědźa sej wobydlerjo z tutej sta lět znatej metodu pomhać? Njech spytaja žiwjenski rum za łastojčki wutworić! By to rjany nadawk za přećelow přirody był.
Pisaja wo jutrach
Zapósłane (07.03.25)
Regina Šołćina z Konjec dźakuje so po tutym puću za wopokazany dźak po smjerći mandźelskeho Jana Šołty:
Hnujace a wutrobne słowa w našej gmejnskej nowinje su tróštowace, a tola přeco zaso při čitanju sylzy wuwabjeja. Waš pčołar-wučer, lube dźěći, je was a pčołki jenak lubował, naš „nano“, Jan Šołta z Konjec je hišće telko z wami předwidźane měł. Ale nětko wottam, hdźež je wón swój pokoj namakał, by wam dobru radu dał: Čińće z toho, štož wam ja spytach we wědźe sobu do žiwjenja dać, to najlěpše a wopokažće so mojeje prócy hódni!
Thomas Alva Edison nam praji: „Twoja hódnota wobsteji w tym, štož sy, a nic w tym, štož maš!“
Po tutym puću tež hłuboki a sprawny dźak Serbskej zakładnej šuli Ralbicy, jeje šulerjam a wučerjam runje tak kaž Serbskej wyšej šuli Ralbicy jako projektnej šuli UNESCO za waše sprawne spominanje. Wulki dźak słuša dźěćom a kolegijej.
Zapósłane (05.03.25)
Alfons Ryćer z Šunowa piše:
W póndźelnišim wudaću Serbskich Nowin je so Maximilian Gruber chětro pesimistisce nastupajo serbowanje na póstniskich dnjach w Kulowje wuprajił (hlej přilopk „Hórki póstniski plack“).
Sam sym z wulkim zadźiwanjom něšto cyle nawopačne a za mnje chětro njezwučene dožiwił. We wšitkich barach wisachu a ležachu mjenujcy dwurěčne serbsko-němske napojowe lisćiny (hlej wobraz). A wospjet dožiwich, zo prócowachu so němskorěčni posłužowarjo w barach mi přećelnje moju skazanku serwěrować, jako ju jim serbsce přednjesech. Po naprašowanju mi wopodstatnichu, zo je tuta widźomna dwurěčnosć wurazne přeće princowskeho pora – dalokož wěm scyła prěni raz w stawiznach Kulowskeho karnewala. Wulki dźak jimaj, zo z tym jara sebjewědomje serbskosć do zjawnosće njesetaj.
A njeje po mojim měnjenju trjeba, stajnje wšitko čornje a pesimistisce widźeć. Druhdy zetkawamy so ze žiwej serbskosću tež na cyle njewočakowane wašnje, kaž to wopisane dožiwjenje pokazuje.
Zapósłane (04.03.25)
Jan Wjenk z Wotrowa: Štó swěcu w Serbach hasnje?
Jako do Delan jědźech, přijědźe mi bus z Kamjenca napřećo. Při busowym zastanišću w Jaworje widźach, kelko dźěći ze šulskej tobołu wulěze a do směra Miłoćic a Jawory nóžkuje. Někotre dny pozdźišo wobkedźbowach to samsne w Pančicach-Kukowje. Kak dołho hišće, a změjemy w Pančicach podobny staw kaž w Radworju? Wo tym sym wšelakim serbskim wosobinam listy pisał, ale ničo so njesta, tež w rozhłosu žane słowo. To mje jara mjerza!
Zapósłane (26.02.25)
Alfons Ryćer ze Šunowa:
Wólby do Zwjazkoweho sejma su nimo. A zaso njezmějemy žanoho zapósłanca, kotryž so specielnje wo serbske naležnosće stara. Při tym by to bjeze wšeho móžno było. Wšako wobsahuje Zwjazkowy wólbny zakoń hižo wot lěta 1949 wosebite wuwzaćne rjadowanje za připóznate narodne mjeńšiny w Němskej. Jelizo nastupja wone mjenujcy z politiskim zastupnistwom k wólbam, njepłaći za nje tak mjenowana pjećprocentowska hranična klawsla za docpěće mandatow (na tutej klawsli stej na přikład FDP a BSW zašłu njedźelu zwrěšćiłoj).
Danojo a Frizojo su mudri. Woni tute wuwzaćne zakonske rjadowanje wušiknje wužiwaja. Su sej za to załožili Južnoschleswigski wolerski zwjazk (němska skrótšenka SSW). Z nim mějachu hižo w lěće 1949 zastupjerja w Zwjazkowym sejmje. A zašłu njedźelu je so jim to znowa poradźiło – z jeničce něšto wjace hač 55 000 hłosami. Bjezmała bychu při wotpowědnej wyšej ličbje wolerjow hišće dalšeho zapósłanca dóstali.
Wuslědk pači – tež w Serbach
Tadej Šołta z Prawoćic:
„Sym jara přesłapjeny, zo je AfD zaso tak sylna a zo w Budyskim a Zhorjelskim wokrjesu najsylniša. Wjeselu so pak, zo je so Lěwica zaso tróšku zhrabała a w tutej periodźe znowa w zwjazkowym sejmje sedźi.“
Pauline Scharfenberg z Bronja:
„Njejsym z wólbnym wuslědkom spokojom, dokelž to žanu woprawdźitu politisku změnu njepřinjese. Aktualni politikarjo wjedu husto jenož stare koncepty dale, město toho, zo woprawdźite alternatiwy poskićeja. Wažne temy kaž migracija, wěstota a narodne zajimy so dosahajcy njewobkedźbuja. Mnozy ludźo so zastupjeni nječuja a aktualny wuslědk pokazuje, zo so mało změni.“
Hannes Bulank z Worklec:
Zapósłane (21.02.25)
Na přilopk Milenki Rječcyneje minjenu wutoru reaguje dr. Měrćin Wałda a so myslam přizamknje:
Snano móhli so jeje zwěsćenja hišće dale plesć. Serbja su historisce zrosćeny awtochtony lud we Łužicy. Woni sydla tu jako lud hižo wot zažneho srjedźowěka a su samostatnu kulturu a rěč wuwiwali. Zo so woni oficialnje tež narodna mjeńšina mjenuja, je za němski stat zarjadniskotechniske a narodoprawniske kategorizowanje, kotrež so předewšěm na modernym statnym prawje orientuje. To je w porjadku. Přiwšěm je fakt, zo nimaja Serbja swójski maćerny kraj, kaž je to na přikład pola druhich mjeńšin ze škitnym statom. To čini Serbow wosebje škita potrěbnych, dokelž wotwisuje jich dalewobstaće a připóznaće jako lud z wotpowědnymi prawami jeničce wot připóznaća a podpěry němskeho stata.
