Serbska rjadownja lětušeho 1. lětnika w Radworju njesmě so ze sydom šulerjemi wutworić, dokelž je to krajnemu zarjadej za šulu a kubłanje (LaSuB) přemało. Serbske Nowiny wobhonichu so mjez čitarjemi za jich měnjenjom.

Tomaš Rječka z Kamjeneje, gmejnski radźićel a čłon šulskeje konferency w Radworju: „Gmejna na tym wobsteji, zo so serbska rjadownja w 1. lětniku wutwori. Wojujemy za to a chcemy škodu za serbski přichod wotwobarać. Njebudźemy přihladować, kak LaSuB postupuje. Trjebamy skónčnje hinaše zakonske rjadowanja. Radwor njesmě serbsku šulu zhubić, wona je za zhromadne žiwjenje njeparujomna.“