Direktor Załožby za serbski lud Jan Budar je so składnostnje podlěšenja swojeho zrěčenja k wšelakim twarnišćam narodneho žiwjenja na prašenja Marcela Braumana wuprajał.

Mnozy sej mysla, zo je direktor Załožby za serbski lud najmócniša wosoba w Serbach, wšako steji na čole zarjada, kiž spěchowanske srědki institucijam a projektam rozdźěluje. Kak widźiće swoju rólu w serbskim ludźe: sylny knjez abo najwyši posłužbar?

J. Budar: Kompetency organow załožby su jasnje rjadowane. Mój hłowny nadawk jako direktor je, zo naš zarjad derje funguje a zo su naše gremije derje na swoje posedźenja a rozsudy přihotowane. Tež hdyž móžu jako šef zarjada tójšto sam postajeć, rozsudźa naše gremije wo zasadach rozdźělenja srědkow. Moja móc leži potajkim bóle w móžnosći, čłonow a čłonki Załožboweje rady a přiradow wo trěbnosći toho abo tamneho rozsuda přeswědčić spytać. W tutym konteksće widźu so bóle jako moderator a słužownik hač jako postajowacy a žadacy knjez.