Wo nowej kulturje witanja nawrótnikow a wabjenja za region
Grodk (JoS/SN). Wot 2017 organizuja towaršnosć ASG Grodk zwr a dalši partnerojo kóžde lěto składnostnje tamnišeho domizniskeho swjedźenja lětni swjedźeń nawrótnikow. Zaměr je přichodne dźěłowe mocy do regiona wabić. Tak chcedźa předewšěm ludźi narěčeć, kotřiž su domiznu dźěła dla před lětami wopušćili. Wuspěch bě w prěnich lětach a na to korony dla skerje skromny. Lětsa pak je so to naraz dospołnje změniło. Přičina toho je signalizowana potrjeba dźěłowych mocow na Čornopumpskim industrijnišću. Tule dźe wo 3 000 dźěławych w přichodnych pjeć lětach. Nimo toho je towaršnosć Koporowy šćěpjel zwr (KSL) potrjebu tysac sobudźěłaćerjow za předwidźane koporowošćěpjelowe podkopki mjenowała. Zwotkel pak ma telko ludźi přińć? Hoberski poskitk personala kaž na spočatku 1950tych lět při „twarje młodźiny“, Dubrawskeje milinarnje, abo při natwarje Čorneje Pumpy ženje wjace njebudźe. Trěbni su fachowcy z wysokej kwalifikaciju.
