Analyza kolesowarskeho wobchada na kolesowarskim puću podłu Wódry a Nysy w lěće 2023 je wunjesła, zo tči za tym wuznamny hospodarski faktor. Nadawk k tomu je wokrjes Sprjewja-Nysa dał, projektowy partner bě zdobom Marketingowa towaršnosć Hornja Łužica-Delnja Šleska (MGO).
Baršć/Budyšin (SN/at). Přepytowanje je prěnje zwjazkowe kraje Mecklenburgsko-Předpomorsku, Braniborsku a Saksku přesahowace a złožuje so na mnóstwo kolesowacych na dźewjeć stacijach mjez Žitawu a Ahlbeckom na kupje Usedom. Loni mjez junijom a septembrom su so nimokolesowacych na sydom dypkach nastupajo motiwaciju, dołhosć tury a konsumowe zadźerženje woprašowali. Tak chcychu zestawu wužiwanskich skupin zwěsćić. W srjedźišću steješe turistiske kolesowanje, wšědnje tam kolesowacych registrowachu jenož po ličbje.
