Druhi raz wuhotowaše Ralbičanska wyša­ šula wóndano „Regionalne po­wołanske wiki“. Njemało zajimčow a zajimcow je přichwatało. Tež podi­jowa diskusija­ bě lětsa wobstatk programa.

Štóž šulu zakónči, ma w optimalnym padźe plan, što chce ze swojim přichodom započinać. Za šulerki a šulerjow je tuž esencielne, zo informuja so wo móž­nosćach wukubłanja, wšojedne, hač na uniwersiće abo w zawodach. Ralbičanska serbska wyša šula je wóndano druhi raz tajki poskitk informowanja zarjadowała.

„Regionalne powołanske wiki“ – za tutym hesłom chowa so pisany poskitk. Zawody z dwurěčneje Hornjeje Łužicy jón zarjadowachu. Z wothłosom su organizatorojo jara spokojom. Jedyn z organizowacych wučerjow, Mathias Kliemank, po zarjadowanju přeradźi: „Dopołdnja běše něhdźe 500 šulerkow a šulerjow tu, kotřiž su z busom přijěli. Hala bě potajkim stajnje połna.“ Wosebje chwali sej Kliemank wulki angažement wustajerjow, kotřiž „spytachu šulerkam a šulerjam woprawdźe něšto praktiske sobu na puć dać.“ Wosebity highlight bě za njeho podijowa diskusija, kotruž běchu lětsa prěni raz zarjadowali.