„Alianca za kolije“ sej přikład Budyšina chwali

Budyšin (SN/BŠe). Hišće před něhdźe dźesać lětami njebě w Budyskim dwórnišću žiwjenje. Němska železnica je čakansku halu Budyskeho dwórnišća samo dospołnje zawrěła. Přičina toho běše, zo je pječa wobmjetk z wjercha padał. W lěće 2016 wobzamkny wokrjesny sejmik skónčnje, dźěle swojeho zarjada přicho­dnje w twarjenju zaměstnić. To wjedźeše k tomu, zo staj priwatnaj inwestoraj Jörg Drews a Gerald Lucas twarjenje přewzałoj a mjez lětami 2017 do 2020 wobšěrnje saněrowałoj. „Jedne z najwažnišich twarjenjow města Budyšina bu we woprawdźitym zmysle słowa wuchowane,“ zwurazni bywši krajny rada Budyskeho wokrjesa Michael Harig před pjeć lětami hladajo na nowe wobličo Budyskeho dwórnišća. Nětko zamołwići płody za přetwar žněja. Zwjazk Alianca za kolije je Budyske dwórnišćo za „dwórnišćo lěta“ wuzwoliła. Twarjenje je ze swojimi swětłymi a rjanymi nutřkownymi rumnosćemi kaž tež z fasadu přeswědčiło, zwjazk wčera zdźěli.