We Wojerecach přeslědźa awtomatizowany nadróžny wobchad

Wojerecy chcedźa z přikładom być a awtomatizowane­ jězdźenje přeslědźić a testować. Projekt změny strukturow „Wěstota splećeneho a awtomatizowaneho nadróžneho wobchada“ (SivaS) so za to derje hodźi. Hač do lěta 2027 nastanje na Čornochołmčanskej přemysłowej přestrjeni centrum za awtomatizowane jězdźenje (Smart Mobility Lab). Něhdźe 150 milionow eurow za to inwestuja. Dźěl kóštow přewzaja EU, Zwjazk a Swobodny stat Sakska. Iniciator a přichodny wobhospodar centruma je Drježdźanska Techniska uniwersita. Za něhdźe 40 milionow eurow planuja na samsnym městnje slědźenski institut za awtomatizowane jězdźenje. Powšitkownowužitna załožba jako korporacija zjawneho prawa ma po móžnosći přichodny nošer być. „Ličimy za wobaj projektaj cyłkownje z něhdźe 200 do 300 dźěłowymi městnami. A wězo nadźijamy so dalšich pozitiwnych wuskutkow“, nawoda projekta SivaS profesor dr. Günther Prokop wuswětli. Wón je zdobom profesor za techniku jězdźidłow na fakulće za wobchadne wě­domosće „Friedrich List“.