Budyšin (CS/SN). Dźesate zarjadowanje Nawij přichoda je sobotu wjacore sta zajimcow přiwabiło. Přećah z něhdyšeje Studijneje akademije do Budyskeho Powołanskošulskeho centruma bě so jako dobry wopokazał. Rumnosće kaž sportowa hala a kabinety za techniku skićichu wjace hač sto wustajerjam dosć městna. Krajnoradny zarjad je prěni króć naprašnik wuwił a tak zhonił, zo bě wjetšina wopytowarjow z wosobowym awtom abo z kolesom přijěła a zo pochadźachu z Budyskeho a Zhorjelskeho wokrjesa. Wo wikach su zajimcy ze socialnych medijow, rozhłosa a nowinow zhonili. Poskitk wustajerjow wopřiješe techniske, rjemjeslniske, socialne a zarjadniske powołanja. Mjez nimi běše tež Serbska fachowa šula za socialnistwo. Nažel njeje na wabjenskim baneru kaž tež na informaciskim materialu za socialneho asistenta kaž tež kubłarja ničo wo serbskim podźělu wukubłanja napisane było. Fachowa nawodnica Elke Jäckel so starosći, dokelž serbscy požadarjo za wukubłanje pobrachuja. Maja drje dwě rjadowni, ale jenož w jednej wuknu maćeršćinarjo a to wob lěto jeničce dwaj abo třo.