Wojerecy (AK/SN). Turistiski zwjazk Łužiska jězorina chce w přichodźe wjace pólskich dowolnikow a turistow do regiona přiwabić. Tole podšmórny předsydka zwjazka Kathrin Winkler wutoru we Wojerecach. „Před dźesać lětami smy z wabjenjom na čěskich wikach započinali. Nětko so tež na pólske wiki zwažimy“, wona znazorni. W zwisku z tym ma zwjazk lětsa prěni raz dowolowu kartu jězoriny tež w pólšćinje, kotruž nochce jenož we Łužicy, ale z pomocu turistiskich partnerow tež w Pólskej šěrić. „Pólske wiki su dźeń a relewantniše za nas“, wu­zběhny Kathrin Winkler a doda: „W lěće 2024 smy cyłkownje 311 347 wopytowarjow měli. Wot tutych běše 2 555 hosći z Pólskeje. Porno lětu 2023 je jich ličba wo 23,8 procentow stupała“.

Dowolowa karta w formaće A5 informuje wo turistiskich poskitkach we Łužiskej jězorinje. Wona pokazuje kolesowarske puće abo městnosće za wodosport a wočerstwjenje. Nimo toho znazornja temy kaž industrijowu kulturu, změnu krajiny kaž tež hrody, parki a zahrody regiona. Turistiski zwjazk Łužiska jězorina je dowolowu kartu w kooperaciji z regionalnymi a pólskimi partnerami zestajała.