Kooperaciju mjez milinowym koncernom LEAG a uniwersitu podlěšili

Grodk (AK/SN). Na płoninach, hdźež bě něhdy wuhlowa jama, móže sej přiroda spěšnje a mnohostronsce swój žiwjenski rum wróćo zdobyć. A to tež bjez toho zo čłowjek zapřimnje. Tak su so tam družiny štomow kaž chójna, robinija a brěza wupřestrěli. Rostliny kaž rokotnik, žandawa (Ginster) abo dźećel so tohorunja jewja. Tež wšelake zwěrjata su so zadomili. Wopisane wuwića su dopóznaća slědźerskeho projekta „Žórlišćo Kurjaceje wody“, kotryž bu w lěće 2005 zahajeny. Fachowcy slědźa na šěsć hektarow wulkej přestrjeni we wobłuku rekultiwěrowanskeje płoniny bywšeje brunicoweje jamy Wjelcej-juh. Woni su z Braniborskeje Techniskeje uniwersity Choćebuz-Zły Komorow (BTU) a z druhich institucijow z tu a wukraja. Dźakowano kooperaciji z koncernom LEAG smědźa projekt dalše pjeć lět přewjesć. Profesorka a prezidentka BTU dr. Gesine Grande a nawoda wobłuka za geotechniku pola LEAG dr. Thomas Koch staj wotpowědne kooperaciske zrěčenje wčera podpisałoj.