Přiležnosć njezapasć!
Šulerjo na powołanskej orientaciji jara zajimowani
Budyšin/Kamjenc/Kulow (SN/BŠe). Najwjetša akcija powołanskeje orientacije Swobodneho stata Sakskeje „Pohladaj nutř“ wabi tež lětsa zaso dosć zajimcow. Na internetnych stronach móžachu so młodostni wot 7. lětnika za jednotliwe poskitki předewzaćow přizjewić.
Druhi raz je tež chorownja maltezow swj. Jana w Kamjencu mjez wobdźělnikami, a tak tam dźensa kaž tež jutře zajimcow witaja. „Mamy dosć přizjewjenjow a smy derje wućeženi“, praji asistentka hladanskeje direkcije Annett Gersdorf. Nimo chorobnych sotrow w Kamjencu tež baby pytaja. Zo móhli so zajimcy z chorownju zeznajomić, su zamołwići wobšěrny program zestajeli. Chcedźa młodostnych po chorowni wodźić, a wězo móža so woni praktisce wuspytać a na přikład gipsować.
Spočatk apryla budźe jězorzaso přistupny
Turistisce wužiwane wodźizny su za dalewuwiće łužiskeje jězoriny jara wažne. Zamołwitej zaměrowej zwjazkaj Sakskeje a Braniborskeje stej tuž wolóženej, zo budźe Złokomorowski jězor wot noweje sezony zaso přistupny. Wšako je turistiski magnet kónčiny.
Hamor (AK/SN). Złokomorowski jězor smědźa přichodnu sezonu wot apryla turistisce zaso dospołnje wužiwać. To podšmórny nawoda saněrowanskeho wobłuka Łužiskeje a srjedźoněmskeje towaršnosće hórnistwoweho zarjadnistwa (LMBV) Manfred Kolba na wčerawšim posedźenju zaměroweho zwjazka Łužiska jězorina Sakskeje w Hamoru. „Zawěsćenske dźěła na přibrjohu kónc měrca wotzamknjemy. Tak móžemy jězor definitiwnje za wužiwanje přepodać. Zhromadnje z wokrjesom Hornje Błóta-Łužica, z hórniskim a dalšimi zarjadami je to wothłosowane“, Kolba zawěsći.
Awtotwarc Porsche je dźensa w Lipsku zakładny kamjeń za mjeztym ...
Šok a wulki protest
Štó zamołwja pohórnistwowe škody bywšich brunicowych jamow dla?
Wulke Ždźary/Lauchhammer (SN/BŠe). Łužiska krajina je charakterizowana wot brunicoweho hórnistwa. Nasypy a hoberske, zdźěla z wodu pjelnjene dźěry su wuslědk wudobywanja brunicy w regionje. Mjez druhim nasta tak najstarši jězor po hórnistwje – Hórnikečanski, do kotrehož bě w lěće 1945 njekontrolowanje woda běžała. Jězor je so spěšnje na wočerstwjenišćo wuwił. Ale nichtó na to njemysleše, zo móhła so snadź raz zemja zesuwać. W lěće 2014 je k tomu dóšło, a Sakski wyši hórniski zarjad w Freibergu wobzamkny wobšěrne ponowjenje. Wot toho časa jězor přistupny njeje, po wšěm zdaću hač do lěta 2022.
Łužica ma nadal z pohórnistwowymi škodami ličić a dyrbi z nimi wobchadźeć. Zakonsce dokładnje pak ma zrjadować, štó je za škody hórnistwa před nimale 100 lětami zamołwity? Dypk w zjednoćenskim zrěčenju wobjednawa jeničce prawnisku zamołwitosć aktiwnych brunicowych jamow po Druhej swětowej wójnje. Za potrjechenych Hórnikečanskeho jězora je to potajkim na zbožo hranica.
Wobšěrny poskitk wabił
Na Drježdźanskich twarskich wikach tež serbscy wustajerjo pódla byli
Drježdźany (aha/SN). Tysacy zajimcow wopytachu wot minjeneho pjatka do njedźele twarske wiki w Drježdźanach, kotrež tam wot časa přewróta kóžde lěto přewjeduja. Su to najwjetše swojeho razu, cyłeje Němskeje. Na wikach předstaji so tónraz wjace hač 500 wustajerjow z najlěpšimi idejemi nowotwara swójskeho domu, saněrowanja abo wuhotowanja domu. Wšitke štyri hale běchu z atraktiwnymi přehladkami połnje wobsadźene a aktualna dynamika w twarstwje bě mjez wustajerjemi kaž tež wopytowarjemi spóznajomna.
Na městnje so z praktiskim dźěłom zeznajomili
Kamjenc (aha/SN). Wčera bě tomu dwanaty raz, zo je wotrjad Budyskeho krajnoradneho zarjada za hospodarske spěchowanje w sportowni Kamjenskeho Lessingoweho gymnazija powołanske wiki přewjedł. Zamołwita Andrea Prager hódnoćeše, zo je so cyłkownje 76 wobdźělenych předewzaćow derje předstajiło, a chwaleše tež dobre wobdźělenje šulerjow z Kamjenskeje kónčiny.
Nimale 800 šulerjow bě so přizjewiło, mjez nimi tež ze Serbskeje wyšeje šule Ralbicy. Ze 32 šulerjemi bě tam Tobias Bulank, kiž wuwučuje w 9. lětniku předmjet hospodarstwo, technika a domjacnosć. Rozrjadowani na skupiny mějachu wopytowarjo składnosć, rozhladować so po wobšěrnej přehladce móžnych powołanjow. Wone sahachu wot tradicionalnych rjemjeslniskich přez móžnosće w industriji hač k wobłukomaj socialnistwa abo posłužbnistwa.
Misija njeznate powołanske žiwjenje
Budyšin (SN/BŠe). Wjacore sakske předewzaća wotewru přichodny tydźeń swój zawod, zo bychu młodostnym zmóžnili raz za kulisy hladać a so z nim zeznajomić. Misija „Njeznate powołanske žiwjenje“ pod hesłom „Pohladaj nutř“ skići wopytowarjam składnosć, předewzaćelow kaž tež jich přistajenych wosobinsce zeznać a sej tak swójski wobraz tworić.
Na wotpowědnych internetnych stronach móžachu so zajimcy hač do spočatka měsaca za najwšelakoriše poskitki předewzaćow přizjewić. Lutobčanske předewzaće Femtech je wjelelětny swěrny wobdźělnik zarjadowanja. Tež lětsa wotewrje swój zawod. Samozrozumliwje pytaja runje tak łužiske chorownje, hladanske stacije a starownje za dorostom. Tam su zamołwići tohorunja program spřihotowali, zo móhli sej młodostni wšelake powołanske směry zbližić. Hladajo na twarski wobłuk je mjez druhim Bukečanski twarski zawod mjez wobdźělnikami, kotryž wabi za powołani mulerja a ćěsle.
Prěni domjacy hromak žnjeli
Nienburg (dpa/SN). Ratarjo w Delnjej Sakskej su prěni domjacy hromak žnjeli. Dźakowano tepjenju w specielnje přihotowanej pódźe móžachu burja hižo žnjeć započeć. „Smy z ćopłej wodu dźěłace tepjenje do zemje połožili a hromak trójce zawodźěli“, rozłoži plahowar hromaka Carsten Bolte z Lichtenhorsta w delnjosakskim wokrjesu Nienburg. Jeho zawod słuša k prěnim w Němskej, kotrež móža hižo spočatk měrca hromak předawać.
Po wšej Němskej je najwjace dźesać zawodow, poskićace wot minjeneho tydźenja „tepjeny hromak“. Tón ma wězo swoju płaćiznu: Wulkowikowarjo płaća 14 do 18 eurow na kilogram. Płaćizna za kupca wučinja něhdźe 19 eurow.
Poprawne žně hromaka zahaja so w Němskej kónc měrca hač dosrjedź apryla. Jasne dotal njeje, kak je hromak dołho trajacu suchotu minjeneho lěta znjesł. Hromak trjeba po žnjach w lěću dešć, zo by rosć móhł a dźakowano fotosyntezy zaso energiju zběrał. Dešćik pak je loni wupadnył. Ratarjo kaž Bolte su tuž rostliny krjepili. Hač su přirodny dešć narunać móhli, so drje hakle pokaza.
Znajomosće metalotwarca tež w ratarstwje wužitne
Budyšin (CS/SN). Ličby lubja optimizm: Su-li lěta 2017 z wobłuka Budyskeho wokrjesneho rjemjeslnistwa 31 wučomnikow po połštwórtalětnym wukubłanju wuwjazali, bě jich loni 42 a lětsa samo 47 z powołanskich skupin připrawowy mechanikar, elektronikar a metalotwarc.
Swjedźenska ceremonija wotmě so minjenu sobotu w Budyskim Dźiwadle na hrodźe po tradicionalnym wašnju. Chorhoje zjednoćenstwow na žurlu přinjesši su tam zjednoćenstwowu křinju wočinili. Dołhož je wona wočinjena, njesmě so łžeć a žadyn alkohol pić. Piwo je wuwzaće, wšako maja je za cyrobiznu. Zastupujcy swojich starobnych towaršow smědźachu třo najlěpši wučomnicy lětnika z čestnymi hosćimi składnostnje swojeho wuswobodźenja karančk piwa wupić.
Nimo staršich a wukubłarjow wobdźělichu so na swjatočnosći tež sakski kultusowy minister Christian Piwarz, Budyski krajny rada Michael Harig (wobaj CDU), tudyši wyši měšćanosta Alexander Ahrens (SPD), wokrjesny rjemjeslniski mišter Frank Scholze a dalši.
