Budyšin (UM/SN). Planowanja za zwisk mjez Nowoměšćanskej dróhu a zawodom Bombardier w Budyšinje su dale a konkretniše. Na njedawnym informaciskim zarjadowanju su wobydlerjam naprawu předstajili. Hižo lětsa w septembru chcedźa twarić započeć. Kónc lěta ma nowy přijězd do zawoda hotowy być. Nowy móst nad Sprjewju pak nastanje wot apryla do třećeho kwartala lěta 2020. Sobudźěłaćer planowanskeho běrowa Daniel Linde rozkładźe, zo „budźe puć tež z chódnikom wuhotowany. Kolesowanska šćežka porno tomu trěbna njeje. Po přepytowanju móža kolesowarjo puć bjez wobmyslenja sobu wužiwać.“
Nastupajo topografiju a škitahódny wobstatk štomow podłu Sprjewje budźe puć přepołoženy. Za to dyrbja 25 štomow podrězać. Podłu Nowoměšćanskeje chcedźa chódnik kaž tež kolesowansku šćežku hač na busowe zastanišćo wotbóčki wagonownje dale wjesć. Tak zadźěwaja w tym wobłuku strachej njezbožow. Za čas twarskich dźěłow njeměło k wjetšim wobchadnym haćenjam dóńć. Něhdźe pjeć tydźenjow pak budźe wobjězdka po Hrubjelčanskim puću trěbna. Zdźěla ma potom ampla wobchad rjadować.
Łužiska jězorina so zaměrnje dale wuwiwa. Nimo wodźiznow z přistupnymi přibrjohami a wotpowědnymi poskitkami su tež kanale wažne, kotrež tworja wěstu syć a zdobom wuběrne móžnosće łódźnistwa.
Zły Komorow (SN/BŠe). We łužiskej jězorinje budźe dalši kanal za łódźnistwo twarjeny. Po lětach čakanja je sakska krajna direkcije ze sydłom w Kamjenicy minjeny tydźeń twarski wukaz za trěbny přechod z mjenom 3a dowoliła, z kotrymž přichodnje mjez Blunjanskim a Nowołučanskim jězorom zwisk nastanje. Kaž z planowanjow wuchadźa, budźe kanal něhdźe 420 metrow dołhi a šěsć do 25 metrow šěroki. Próstwu za njón zapodała bě Łužiska a srjedźoněmska towaršnosć hórnistwoweho zarjadnistwa (LMBV), kotraž tudyšu brunicowu kónčinu saněruje.
Choćebuske tradicionalne rjemjeslniske wiki je kónc tydźenja cyłkownje 280 wustajerjow wuhotowało. Mjez nimi bě znowa Zwjazk serbskich rjemjeslnikow a předewzaćelow ze zhromadnym stejnišćom, čemuž je mjeztym hižo wjele lět tak.
Choćebuz (JoS/SN). W lěće 1993 załoženy Zwjazk serbskich rjemjeslnikow a předewzaćelow (ZSRP) móže mjeztym na 25lětne wuspěšne zhromadne dźěło mjez Hornjej a Delnjej Łužicu zhladować. Přiwšěm sobuzałožer Jan Wjenk na to skedźbnja, zo su so na wikach lětsa jeno štyrjo předewzaćejo ZSRP wobdźělili, mjez nimi Roland Paprot z Choćebuza-Škódowa. Wón sam ma serbske korjenje a bě šuler Delnjoserbskeho gymnazija w měsće. Jeho dźěći so we Witaj-pěstowarni „Mato Rizo“ w Žylowje derje čuja. Z Paprotom do šule chodźił bě poradźowar Heinz-Jürgen Hanška, kiž so nětko tohorunja na rjemjeslniskej přehladce wobdźěli. Dale bě Žylowska šwalčernja Doris Heinzoweje mjez wustajerjemi serbskeho stejnišća. Wšitcy so jara derje wudospołnjachu a su serbski sydlenski rum Łužicy na kónctydźenskich wikach předstajili.
Zły Komorow (AK/SN). We łužiskej jězorinje ma dowol za staršich a zbrašenych ludźi aktraktiwniši a njekomplikowaniši być. Za to zasadźa so jeje mjezy přesahowacy turistiski zwjazk. „Najwjetša barjera je ta we hłowje, kotruž měli přewinyć. A za to je dołhi dych trěbny“, podšmórny jednaćelka zwjazka Kathrin Winkler srjedu na předstajenju brošurki „Łužiska jězorina – bjezbarjernje pućować“. Cyłkowny nakład 20 000 eksemplarow je hotowy – dźakowano financowanju załožby Łužiska jězorina.
Choćebuz (SN/BŠe). Zrěčenje wo archeologiskich přepytowanjach w brunicowymaj jamomaj Janšojce a Wjelcej-juh su koncern Łužiska energija a milinarnje (LEAG), Braniborski krajny zarjad za hladanje pomnikow a Braniborski archeologiski muzej (BLDAM) nětko wo dalše pjeć lět podlěšili. Tak chcedźa wurywanki a kulturne herbstwo zawěsćić a zachować. Z financowanjom a podpěru dźěła spjelnja hórniske předewzaće LEAG swoju zamołwitosć hladajo na braniborski pomnikoškitny zakoń.
„Přez cyłe lěto zaběra so wšědnje 35 sobudźěłaćerjow ze škitom pomnikow. Přepytowanje wulkich přestrjenjow zmóžnja nam xxl-puzzle zestajeć a temy kaž sydlišća z bronzoweho časa, slědźenje wo pućowym systemje abo bywše rjadowanje ležownosćow wobswětlić“, praji nawoda referata za brunicowu archeologiju BLDAM dr. Eberhard Bönisch. LEAG ma přepytowanja za jara wažne a chce ze wšěmi móžnymi srědkami podpěrać. Ćežišćo slědźenjow je dale t. mj. Cokorowa dróha we Wjelčanskej brunicowej jamje, wuznamny zwisk mjez srjedźnej Němskej a Šleskej.
Rakecy (SN/BŠe). Gremij Leaderoweho regiona Hornjołužiska hola a haty w spěchowanskej dobje 2014–2020 namołwja mjeztym jědnaty raz, spěchowanske srědki Europskeje unije požadać. Něhdźe 550 000 eurow je nětko k dispoziciji. Kaž regionalny Leaderowy běrow ze sydłom w Rakecach zdźěli, płaći namołwa wot 15. januara hač do 1. měrca. Ćežišćo twori tónkróć lokalna wuwićowa strategija. Tak móhli zajimcy wo spěchowanske srědki prosyć, kotřiž wotpohladaja staru twarsku substancu we wjesnej kónčinje přetwarjeć. Dale su so zamołwići na to dojednali, inwesticije regionalnych předewzaćow podpěrać. Wažny stołp, kotremuž so zamołwići tohorunja wěnuja, je pjenježna pomoc rybarjam. Tež w aktualnej namołwje je za to wosebity budget předwidźany. Konkretne naprawy a kajkosće su pod www.ohtl.de wopisane.
Regionalny management wězo rady zajimcow w Rakečanskim běrowje nastupajo próstwy za spěchowanske srědki poradźuje. Hižo 8. apryla chce zapodate projektne ideje rozjimać a wo spěchowanskich srědkach rozsudźić.
Błóta (SN/BŠe). Turistiski wobłuk z wysokohódnotnej kwalitu wuwić je turistikarjam w Błótach jara wažne. A zo kroča po prawym puću, pokazuja lońše wuslědki. Z 88 certifikowanymi turistiskimi předewzaćemi, organizacijemi a zjednoćenstwami je kónčina po cyłej Braniborskej wodźaca. Požadarjo wo kwalitny certifikat maja wšitkim jeho serwisowym kriterijam wotpowědować a z nimi zwisowace zamołwitosće spjelnić, štož so wězo dokładnje přepruwuje.
„Sedźimy wšitcy w jednym čołmje“ je hesło wšitkich inwolwowanych předewzaćow, kotrež wusko hromadźe dźěłaja. W nowembru su płody žnjeli, dóstawši wuznamjenjenje prěnjeho kwalitneho regiona Němskeje. Hladajo na přichod chcedźa turistikarjo jednotne kwalitne standardy wobchować a wutwarjeć. Błóta maja so dale na kulturny chłóšćenski region wuwić. Klasiske wobłuki kulturneho turizma sylnišo zapřijeć je jedyn z hłownych zaměrow do přichoda.
Połčnica (UM/SN). Kónc oktobra 2017 zawjedźechu na awtodróze A 4 mjez wotbóčku Ohorn a třiróžkom Drježdźany-sewjer zakaz přesćehnjenja za nakładne awta. Wot toho časa je policija 252 zranjenjow zakaza zwěsćiła. To wuchadźa z wotmołwy sakskeho ministra nutřkowneho Rolanda Wöllera (CDU) na wotpowědne małe naprašowanje Zhorjelskeho zapósłanca krajneho sejma Mirka Schultzy (Lěwica). Policija je w tej dobje 45 planowanych kontrolow přewjedła. Dźewjeć razow wužiwaše při tym ciwilny bus, štyrnaće króć měješe podpěru z helikoptera. W mjenowanej ličbje 45 njejsu kontrole we wobłuku normalnych patruljow zapřijate.
Tuchwilu je do jězbneho směra na Drježdźany mjez wotbóčkomaj Ohorn a Połčnica Lkw-jam zakazane dalše awta přesćahnyć, a to póndźelu wot 7 do 10 hodź., mjez Połčnicu a třiróžkom Drježdźany-sewjer wšědnje wot 7 do 19 hodź. „Do jězbneho směra na Zhorjelc njeje tuchwilu trjeba tajki zakaz postajić“, rěka we wotmołwje ministra.