Stuttgart/Kamjenc (dpa/SN). Awtotwarc Mercedes-Benz chce wažne twarske dźěle za swoje elektroawta přichodnje w Němskej produkować a tak tysacy dźěłowych městnow zaručeć. Kaž je předewzaće wčera w Stuttgarće wozjewiło, ma wotpohlad, přichodne lěta srjedźnu jednocyfrowu miliardowu sumu w Europje a Chinje inwestować. Narok je, hač do lěta 2025 k połojcy elektroawta zhotowjeć a hač do 2030 kmane być, jenož hišće tajke wozydła twarić.

W tutych planach hraje twornja Accumotive w Kamjencu wažnu rólu. Tam chce šwabski awtotwarc baterije za nowe modele elektroawtow produkować. „Tež přichodnu generaciju baterijow Mercedes-Benz tu we Łužicy zhotowjamy“, rjekny nawoda zawoda Thomas Brandstetter powěsćerni dpa. Rozsud ma wón „za jasne wuznaće k stejnišću a wažny signal našim sobudźěłaćerkam a sobudźěłaćerjam“. Tak wostanje stejnišćo za přichod wěste, měni předsyda zawodneje rady Stephan Lauckner.

Z wjace hač 1 500 dźěławymi je Accumotive w Lessingowym měsće wotnožka Daimler AG.

Choćebuz/Wjelcej (SN/at). Aktualny brunicowy plan za jamu Wjelcej-juh maja njewotwisne posudźowarske firmy wobdźěłać. To žada sej wobswětowa syć Zelena liga w stejišću po wčerawšim scoping-terminje na městnje. Tón měješe po wuprajenju krajneho planowanja Berlin-Braniborska oficialny zazběh dźěła k změnje mjenowaneho brunicoweho plana być (SN informowachu).

Kaž Zelena liga informuje, dopokazuje wona w swojim stejišću, zo je firma, kotrejž bu nadawk přepodaty, pak prawi­dłowne hospodarske styki z energijowym předewzaćom Łužiska energija a milinarnje (LEAG) pěstowała. Nimo toho bě tež politisce za wjace wudobywanja brunicy aktiwna. „Tele planowe jednanje wo tym rozsudźa, kak ma LEAG pohórnistwowu krajinu jamy wuhotować“, rjekny Renej Šuster ze Zeleneje ligi dźensa. Za předewzaće „najtuńša warianta naslědne kóšty za powšitkownosć dowysoka ćěri“. Tónle nadawk firmje dowěrić, kotraž ma wuske styki z LEAG, mjenuje Šuster „groteskne“. Zelena liga sej žada proceduru rozdaća wospjetować, zo bychu zamołwići škodu wot powšitkownosće wotwobroćili.