Chróšćenjo pokal dobyli
Dźeń do silwestra wojowachu koparjo wjesnych cyłkow we Worklečanskej ćěłozwučowarni wo 31. pokal Worklečanskeje gmejnskeje skupiny CDU. Na spočatku turněra witaštaj Steffen Roschek, kandidat za zwjazkowy sejm a zapósłanča krajneho sejma Elaine Jenčec (wobaj CDU), kotraž bě patronka tohole woblubowaneho sportoweho ewenta, wšitke wosom cyłkow do sportownje. Tohorunja nawoda turněra Bosćij Knop wšitkich koparjow a dalšich hosći powita.
Po wulosowanju staflow bě hižo jasne, zo budźe horcy bój wo městna w połfinalu. W stafli A wojowachu Nowowješćenjo, Róžeńčenjo a woženjeni z Worklec wo prěnje městna. W prěnjej partiji startowachu Róžeńčenjo přećiwo Nowowješćanam. Na wrota bohata hra skónči ze 4:4. Woženjeni z Worklec přěhrachu hru přećiwo Nowej Wjesce, ale dobychu duel přećiwo Worklečanskej młodźinje. Tohodla rozsudźi hra mjez Róžeńčanami a Worklečanskimi ženjenymi wo tikeće za połfinale. Po njerozsudnej hrě steješe zakitowar Róžant na druhim městnje. Nowa Wjeska swoju poslednju hru wysoko přećiwo Worklecam I doby a sej z tym staflowe dobyće zaruči.
Spočatk lěta hižo dypkowu hru
Worklečanki powitachu na nowolětny domjacy hrajny dźeń mustwo z Běłeje Wody kaž tež žony z Koblic. Z tym nastupichu přećiwo třećemu a druhemu tabulki. Z dohromady štyrnaće hrajerkami bě Worklečanske prěnje zastupnistwo za tutón hrajny dźeń sylnje zastupjene. Team zesylnjachu wolejbulistki z druheho zastupnistwa.
Za Viktoriu Worklecy zasadźeni: Anita Bierbaum, Maika Dźisławkec, Diana Hajnec, Xenia Koberec, Stefanie Köhler, Klara Kralec, Christin Opicec, Jenny Otto, Constance Pötschke, Rejzka Rawšec, Kathrin Spiesec, Anja Šmidtowa, Emma Šustrec, Jana Žurowa; trenarjej: Daniela Kralec a Philipp Babst
Viktoria Worklecy –
Hamor/Běła Woda 3:1
(25:17, 25:10, 22:25, 25:20)
Hodownička hinašeho razu
W dnjach a tydźenjach do hód zetkachu so kolektiwy a towarstwa, zo bychu z poprjancom a winom swoju adwentničku swjećili a stare lěto rozžohnowali.
Pola sportoweho towarstwa Viktoria Worklecy mějachu hinašu ideju. Chcychu lěto tež sportowsce zakónčić. Tuž zetkachu so 20. decembra blidotenisća a wólnočasni wolejbulisća na mały turněr ze slědowacej bjesadu. Dźeń pozdźišo so mužojo wolejbulowych cyłkow Viktorije zetkachu. Wot připołdnja wubědźowachu so štyri mustwa: U18, U20, 1. mustwo a jako překwapjenka mustwo „eksilanća“. To su sportowcy, kiž su so we Worklecach we wolejbulu wukmanili, ale nětko druhdźe aktiwni hraja. Tak so turněr na wysokim hrajnym niwowje wuwi. Wobhladanjahódne akcije při wysokim saku zahorichu horstku přihladowarjow na tribunje. Wuwiće „eksilantow“ a potencial młodych kadlow U18 a U20 su dopokaz za to, zo je ST Viktoria Worklecy přez wjele lěta žórło talentow. Na kóncu zamó sej samo druhe mužace mustwo Viktorije dobyće wuhrać. Slědowaše zhromadna bjesada wšěch wolejbulistow. Mato Eckert
Njeboj so!
Berlin (B/SN). Astrofyzikar Harald Lesch je zwěsćił, zo bě hody před 2 000 lětami konstelacija hwězdow wosebita, bójska. „Najwjetšej planetaj so zetkaštej: Jupiter a Saturn. Jako jara swětłej móhłoj wonej Betlehemsku hwězdu předstajić. Hodowne poselstwo njeje wumyslene. Na swěće, połnym mordarstwa, pak leži bjezmócne dźěćo w žłobiku z powěsću ‚Njeboj so!‘“
Hody bjez wukrajnych putnikow
Betlehem (B/SN). W času wójny na Bliskim wuchodźe běchu hodowne ceremonije naroda Jězusdźěćatka w Betlehemje jara měrne a bjez wukrajnych putnikow a wopytowarjow. Kardinal Pierbatttista Pizzaballa ćehnješe ze stami skawtow po měsće k městnu Jězusoweho naroda, ale bjez kapały a bubonow.
Wo měr na swěće so modlili
Vatikan (B/SN). 26. decembra, na swjateho Šćěpana, su němscy biskopja hromadźe z bamžom Franciskusom na přesćěhanych křesćanow a martrarjow spominali a so za nich a za měr na swěće modlili. Biskop Bertram Meier, předsyda komisije Swětowa cyrkej Němskeje biskopskeje konferency, pisa w interneće: „Wěmy, kak ludźo druhich nabožinow a swětonahladow pod přesćěhanjom ćerpja.“
Sokoljo internje mocy měrili
Posledni pjatk lěta 2024 steješe w Delanach cyle w fokusu kopańcy.
Po tym zo běchu turněry dorosta dohrate, startowachu mužojo Sokoła w 19 hodź. swójski interny koparski turněr. Stari knježa stajichu dwě mustwje, trenarjo jedne a mužojo tři cyłki. Pola muži běchu tež dorostowi hrajerjo z młodźinow A a B zapřijeći. Mustwo muži bu wulosowane, zo by turněr po móžnosći wurunany był. Hraješe so po modusu kóždy přećiwo kóždemu a to stajnje dźewjeć mjeńšinow.
Po třoch hrach docpě mustwo Sokoł I maksimalnje móžne dźewjeć dypkow a na druhim městnje slědowachu Stari knježa I ze sydom dypkami. Tuž běše štwórta hra rozsudna. Sokoł I přez Dawida Šołtu nawjedowaše a chcyše tak městno na čole tabulki zakitować. Tola stara garda njeda so zatrašić a Jens Šołta wuruna. Bosćij Lulak hru zwjertny. Dokładnje w poslednjej sekundźe pak Sokoł I zaso wuruna. Z tym běše dobyćer jasny.
Połna tribuna, wosom wjesnych koparskich cyłkow, razantna kopańca ...
458 wobdźělnikow na Budyskim silwesterskim běhu
Rekord sportowcow docpěli
458 běharkow a běharjow je při 57. Budyskich silwesterskich běhach cilowu liniju w stadionje „Młynkec łuka“ přeprěčiło. Z tym bu najwyša ličba wobdźělnikow docpěta. Hosćićel Budyske sportowe towarstwo „Čerwjenoběli 90“ z.t. wjeseleše so nad dobrej rezonancu Budyskeho silwesterskeho běha a dźakuje so wšitkim sportowcam a podpěraćelam. Wjedro – słónco, temperatury wokoło nule a žadyn wětřik – a běhanska čara běštej nimale perfektnej.
Dobyćerjej hłowneho běha na 10,8 km běštaj Patrick König (Europamarathon Zhorjelc) w 37:07 min. a Hannah Schönmuth (Athletics Team Drježdźany) w 43:54 min.
Na čarje 5,4 kilometry dobyštaj Marco Friedrich (OSLV Budyšin) w 18:39 min. a Kristin Zimmermann (Europamarathon Zhorjelc) w 20:45 min. 2,6 kilometrow zmištrowaštaj najspěšnišo Elias Morgenstern (DSC) w 8:17 min. a Serbowka Sophie Dreßlerec (Budyšin) w 11:28 min.
Christoph Mehnert
3. liga
17.01. 19:00 Hannover 96 U23 –
FC Rudne horiny Aue
18.01. 14:00 1. FC Saarbrücken –
TSV 1860 Mnichow
18.01. 14:00 VfB Stuttgart II –
Hansa Rostock
18.01. 14:00 VfL Osnabrück –
Sandhausen
18.01. 14:00 HZ Unterhaching –
Borussia Dortmund II
18.01. 14:00 Arminia Bielefeld –
FC Energija Choćebuz
18.01. 16:30 Wehen Wiesbaden –
SC Verl
19.01. 13:30 Dynamo Drježdźany –
Viktoria Köln
19.01. 16:30 TSV Alemania Aachen –
Čerwjeno-běli Essen
19.01. 19:30 Waldhof Mannheim –
FC Ingolstadt 04
Widźał, słyšał, napisał (06.01.25)
Awtor dźensa
Tadej Cyž
Sportowe lěto 2025 je so započinało a skići kopicu wjetšich abo mjeńšich zarjadowanjow a wubědźowanjow. Tak zahaji so lěto hižo tradicionelnje z klasikarjemi w sněhakowanju. Swětowy cup w šwicarskim Wengenje a w awstriskim Kitzbühelu zahorja lěto wob lěto wjacore dźesać tysac přiwisnikow zymskeho sporta. Swětowe mišterstwo w sněhakowanju přewjedu w februaru w awstriskim Saalbach Hinterglemm. Dalši wulki wjeršk zahaji so 14. januara w danskim Herning. Tam budźe zahajenska hra swětoweho mišterstwa w mjetańcy. Nimo Danskeje su tež Chorwatska a Norwegska hosćićelej turněra, na kotrymž wobdźěli so cyłkownje 32 narodnych cyłkow. Po slěbornej medali w Parisu na olympiskich hrach słuša mustwo Alfreda Gislassona tež tónraz k faworitam. Dalše wjerški spočatk lěta su mjez druhim Australien Open w tenisu abo Super Bowl, kotryž wotměje so 9. februara w New Orleansu.
Sport (03.01.25)
Worklečanki dwójce doma hraja
Prěnje wolejbulowe mustwo žonow Viktorije Worklecy hraje jutře dwójce doma, a to přećiwo hosćom z Běłeje Wody a z Koblic. Worklečanscy mužojo prěnjeho a druheho mustwa nastupja w Coswigu respektiwnje w Ludwigsdorfje.
04.01. 14:00 SV Viktoria Worklecy –
Boxberg Weißwasser (ž)
04.01. 16:00 SV Viktoria Worklecy –
JTVG Koblicy (ž)
04.01. 16:00 Coswig-Mišno –
Viktoria Worklecy (m)
04.01. 14:00 ST Ludwigsdorf –
Viktoria Worklecy II (m)
11.01. 14:00 VV Žitawa 09 II –
Viktoria Worklecy (ž)
11.01. 14:00 VV Žitawa 09 III –
Viktoria Worklecy II (ž)
Nowolětne běhi we Wojerecach
Sportowy klub Wojerecy přeprošuje wšitke běharki a wšitkich běharjow na mjeztym 46. nowolětne běhi. Běhać budźe so zaso w sportowym forumje, a to njedźelu, 5. januara, wot 10.30 hodź. Hłowny bě ma distancu 6 km a běh za kóždeho je 2 km dołhi. Přizjewjenja su hišće na městnje móžne.
Serbske mustwo žonow hraje
