Chróšćenjo titu zakitowali
Na předposlednim dnju lěta 2019 wotmě so we Worklecach zaso tradicionalny halowy koparski turněr wo pokal wjesneho a gmejnskeho zwjazka CDU. Tónraz wobdźěli so dźesać mustwow, kotrež hrajachu w dwěmaj staflomaj ze zestawu 1:3. Najprjedy wubědźowachu so w staflomaj kóždy přećiwo kóždemu stajnje dźewjeć mjeńšin, po tym hrajachu stajnje prěni a druhi stafle přez křiž wo zaćah do finala.
W stafli B pak nasta njewšědna konstelacija. Druhe młodźinske mustwo z Worklec a cyłk z Chrósćic měještej samsnu ličbu dypkow kaž tež samsny wrotowy poměr. Třělenje ze sydom metrow dobychu Worklečenjo, a tak rěkaše prěnje połfinale druhe młodźinske mustwo z Worklec přećiwo prěnjemu młodźinskemu mustwu z Worklec. Rezerwa hosćićelow duel z 2:1 doby. Najprjedy drje bě prěnje mustwo nawjedowało, dokelž pak dósta jeho hrajer njesportowskeho zadźerženja přećiwo sudnikej čerwjenu kartu, smědźeše mustwo jenož hišće z třomi koparjemi dale hrać. W tej fazy poradźichu so Worklecam II dwoje wrota.
Widźał, słyšał, napisał (06.01.20)
Lubi čitarjo našeje kolumny, tež w lěće 2020 směmy so zaso na někotryžkuli sportowy wulkopodawk wjeselić. Prjed hač sportowe lěto zhromadnje přeńdźemy, mam hišće nowosć z medijow za was. Wotnětka njewusyła mjenujcy Serbski rozhłós wšědnje jenož hodźinku dlěje, ale přidatnje směmy so wotnětka tež kóždu srjedu na dalši rańši sportowy přinošk wjeselić.
Prěni wulki wjeršk lěta, 68. turneja sněhakowarjow po štyrjoch skakanišćach, so dźensa kónči. Njewostanje pak to jenički sportowy podawk w zymje. Hnydom tři dalše spočatk lěta na nas čakaja. Hižo štwórtk so swětowe mišterstwa w mjetańcy zahaja. Wone su lětsa w Awstriskej, Šwedskej a Norwegskej. Šansu na dobyće wuličeja sej při tym tež chowancy trenarja Christiana Prokopa. Cil Němcow wšak rěka: znajmjeńša połfinale. Apropos finale. Mjeztym hižo 54. raz budźe spočatk februara tak mjenowany „super bowl“, potajkim kónčna sezonowa hra w american footballu. A srjedź februara přewjedu w južnotirolskim Antholzu swětowe mišterstwa w biatlonje.
Sport (03.01.20)
Přewjedu zymsku ediciju
Jutře přewjedu młodostni z Kulowa a wokoliny 7. raz tak mjenowany Kulow-cup w zymje. Wot 11.30 do 17.30 hodź. chcedźa w Kulowskej wjacezaměrowej hali za bulom honić. Hosćićeljo, Kulowminatije, přeprošeja wšitkich wólnočasnych a aktiwnych koparjow z města a wokolnych wsow na zymsku ediciju najwjetšeho wrotoweho festiwala regiona.
Kopaja wo pokal TCM
Koparski turněr Towarstwa Cyrila a Metoda (TCM) je jutře, 4. januara, w 15 hodź. w Chróšćanskej „Jednoće“, a to wo pokal TCM. Přeprošene su wosadne a wjesne mustwa młodźiny kaž tež cyłki sportowych jednotkow.
Nowolětny běh we Wojerecach
Wotrjad lochkoatletika sportoweho kluba Wojerecy přewjedźe njedźelu, 5. januara, w sportowym forumje we Wojerecach nowolětny běh. W poskitku změja tam distancy 6 a 2 km. Start je za 10.30 hodź. planowany.
Na kopańcu Němskopazličanow
Koparjo Sportoweho towarstwa Natwar Němske Pazlicy zarjaduja a wuhotuja 5. januara wot 9 do 13 hodź. swój 31. interny halowy koparski turněr, a to w sportowni „Při Boršći“ w Kamjencu.
Wojuja wo S-mobil-trofeju
Dotal njespokojom
Rezimej prěnjeje połserije ST Marijineje hwězdy we wokrjesnej wyšej lize
Po tym zo běchu sej koparjo ST Marijineje hwězdy w hrajnej dobje 2018/2019 ze 70 dypkami mišterstwo we wokrjesnej lize zawěsćili a do wokrjesneje wyšeje ligi postupili, dyrbjachu klasu wyše w prěnjej dypkowej hrě hnydom w serbskim derbyju přećiwo Sokołej Ralbicy/Hórki nastupić. Po dobrym započatku a nawjedowanju pak su hišće z 1:5 podleželi. Na to nastupichu w Kulowje, hdźež wobstachu zasłužbnje 2:2.
Prěnje tři dypki móžachu chowancy trenarja Erwina Kleinmanna w druhej domjacej partiji přećiwo Motorej Kumwałd žnjeć, a to z njewohroženym dobyćom 3:0. Tež dalšej razaj móžeše postupnik dale na so skedźbnić. Najprjedy wudoby sej njewočakowany dypk w Wojerecach (1:1), a tydźeń po tym porazy sobupostupnika TSV Wachau z 5:1. Poražku 2:5 poćerpjechu klóšterscy bulkoparjo w Hornim kraju, dokelž jim wjacori hrajerjo pobrachowachu. Lěpje sčinichu to zaso doma, hdźež su SG Großnaundorf z 3:0 přewinyli.
449 běharkow a běharjow, telko kaž hišće ženje, je so w ...
Krótko do hód hišće raz při wysokim saku sportowali
Pak młodźina w nocy měrnje we łožu spi, pak so na partyjach abo rejach zabawja. Tola sobotu do hód je w nocy zaso raz sportowała. Serbske młodźinske towarstwo Pawk bě na swój kóždolětny nócny wolejbulowy turněr do Pančičanskeje sportownje přeprosyło. Dwanaće mustwow so tam wubědźowaše, zo bychu sej do hód hišće tróšku městna w brjuchu za dobru pječeń spřihotowali. 22. december je přeco zaso witany datum, wšako so to wjetšina młodostnych z wulkich městow ze studija abo wot dźěła do domizny nawróći.
Organizator turněra Fabian Šěrak wopisowaše niwow hrow jako jara wysoki, tež w pózdnjej hodźinje sej mustwa ničo njedarichu. Tola nócny wolejbul njeje jenož wolejbulistam witana móžnosć so zetkać. Něhdźe 80 přihladowarjow so w sportowej hali zhromadźi, zo bychu so při piwje a sporće rozmołwjeli. Tež mały imbis měješe Pawk za hłódnych hosći a sportowcow spřihotowany.
Wokoło hata běželi abo pućowali
Dopołdnjo druheho hodowneho swjateho dnja běchu sej mnozy sportowcy znowa wuplanowali. A tak poda so jich wulka syła mjeztym 19. raz wot 10 hodź. na pjeć kilometrow dołhe koło wokoło wulkeho Němskopazličanskeho hata. Organizatorojo Natwara Němske Pazlicy so chětro dźiwachu, zo bě při špatnym wjedrje 280 ludźi přichwatało. Mjez nimi běchu oldijowi běharjo z Lubija a kopica serbskich sportowych přećelow, Japanjan, sportowc na jednym kolesu z Großröhrsdorfa – wón trjebaše 18 mjeńšinow wokoło wulkeho hata – a wjele dalšich. Tež 50 nowych wobdźělnikow móžachu zamołwići witać, tak mandźelskeju z Großschönauwa. Běh je so mjeztym k tradiciji wuwił. Na jednej stronje móža ludźo w přijomnej atmosferje wokoło hata pućować a bjesadować, runočasnje pak móža so aktiwni běharjo na přikład na silwesterske běhi w Budyšinje abo Oberlichtenauwje přihotować. Wšitcy wobdźělnicy cil bjez zranjenjow docpěchu a dóstachu nimo wopisma a kołka tež darmotny napoj.
Trenar Claus-Dieter Wollitz Energiju wopušćił
Kaž hižo po poslednjej hrě lěta 2019 z wulkej starosću wočakowane je trenar prěnjeho koparskeho mustwa FC Energije Choćebuz nowe zrěčenje sportoweho towarstwa wotpokazał. Hišće hórje pak přińdźe, jako 22. decembra wozjewichu, zo so wjednistwo FC Energije a šefnazwučowar „w mjezsobnej přezjednosći“ 31. decembra rozeńdźetaj. Interimny trenar sta so Sebastian König, dotalny nawoda dorostoweho centruma kluba.
Wuslědki (02.01.20)
Tabulki dorosta Zapadołužiskeho koparskeho zwjazka
młodźina C, wokrjesna liga stafla 2
1. Jednota Kamjenc 9 77 : 3 27
2. TSV Połčnica 8 47 : 10 21
3. Großnaundorf/Lomnitz 8 26 : 21 18
4. Arnsdorfske KT 9 22 : 23 15
5. ST Kinspork/Łužnica 8 21 : 15 12
6. ST Ćisk 9 20 : 27 12
7. HZ Ottendorf-Okrilla/Hermsdorf
9 13 : 28 6
8. ST Liegau-Augustusbad 9 11 : 33 6
9. TSV Wachau 9 1 : 78 0
młodźina C, wokrjesna liga stafla 3
1. HZ DJK Módro-běli Kulow/Wojerowski FC II 11 90 : 26 27
2. ST Bart 11 67 : 20 22
3. HZ Łužica 10 53 : 14 22
4. SC 1911 Großröhrsdorf 11 45 : 12 22
5. HZ Njeswačidło/Rakecy 11 49 : 46 15
6. HZ Traktor Malešecy/Budissa Budyšink
9 24 : 46 10
7. Hlinowski SC 1931 10 17 : 94 3
8. HZ Ćisk/LSV Hory/HZ Łaz/Běły Chołmc
11 16 : 103 3
młodźina D, wokrjesna wyša liga
1. Wojerowski FC 8 8 : 1 22
2. LSV Hory 1990 8 7 : 1 21
3. FSV Łuty 8 6 : 3 16
4. Módro-běli Kulow 8 4 : 4 12
4. ST Ćisk II 8 4 : 4 12
6. ST Lubuš 8 3 : 4 10
7. Rakečanske ST 8 2 : 6 6
8. SZ Wóslink/Skaskow 8 1 : 6 4
9. HZ Łaz/Běły Chołmc II 8 1 : 7 3
Hwězdźički-micki přećiwnikej w pokalnym finalu podleželi
Na wobwodne pokalne finale do Kundraćic bě sej sobotu, 14. decembra, druhe zastupnistwo wolejbulistkow Hrajneho zjednoćenstwa Pančicy-Worklecy dojěło. Dokelž bě so jeno šěsć mustwow za pokalnu seriju přizjewiło, běchu wone do dweju staflow rozrjadowane. Stafle běchu po ligach měšane, to rěka, zo su cyłki z wobwodneje klasy kaž tež z wobwodneje ligi nastupili.
W předkole běštej sej mustwo z Kundraćic w stafli B a druhe zastupnistwo Hrajneho zjednoćenstwa Pančicy-Worklecy w stafli A dobyće zawěsćiłoj.
Prěnje zastupnistwo HZ Pančicy-Worklecy, kotrež bě w předkole Kundraćicam z 1:2 podležało, njebě so za finale kwalifikowało. Rezerwa žonow hrajneho zjednoćenstwa pak bě so w předkole přećiwo teamej Nysa Wolejs II a Módro-běłym Wojerecy ze stajnje 2:0 přesadźiła (SN rozprawjachu).
