Na wokrjesnych volleyballowych mišterstwach seniorow, staršich hač 50 lět, doby ST Marijina hwězda wšitke partije z 2:0 a tak prěni raz titul wo­krjesneho mištra. Budyska FSG je po słabym starće nětko druha mjez štyrjomi startowacymi cyłkami.

Pjatnaty raz wuhrachu minjenu sobotu w Budyskim wokrjesu volleyballowe mišterstwa seniorow­ nad 50 lětami. Štyri cyłki su přeprošenje wokrjesneho sportoweho zwjazka do hale Serbskeho šulskeho a zetkawanskeho centruma Budyšin sćěhowali. Wulosowanje chcyše, zo trjechi­štej w prěnjej hrě najsylnišej mustwje na so. Senioram ST Marijineje hwězdy poradźi so přećiwo Budyskej FSG optimalny start, nawjedowachu po štyrjoch mjeńšinach 8:2 a pozdźišo jasnje 16:8. Wšitko, štož sej Budyšenjo předewzachu, so nimokuli. Tak padachu nadaća do saka a nadběhej falowaše trěbna móc, dokelž bě přijimanje nadaćow njedokładne. Pančičenjo so nad 25:16 wjeselachu.

Jednota Kamjenc

– Wismut Gera 3:0 (0:0)

Zestawa domjacych: Wochnik – Woko, Langr (84. Am Ende), Ranninger, Sobe (70. Schmidt), Höer, Vrabec, Häfner, Prentki, Schidun, Tänzer (86. Berg)

Prěnje poł hodźiny sobotneje koparskeje hry słušeše hosćom. Koparjo Jednoty móžachu jeno zrědka přećiwnisku šěsnatku docpěć. Mustwo z Gery třěleše husto na wrota wrotarja Jednoty Kamjenc Rona Wochnika, přeco zaso pak bě noha hrajerja domjacych na puću. Hosćićel bě w tej fazy po zdaću nerwozny, wšako běše to tak mjenowana šěsćdypkowa partija přećiwo tabulkowemu susodej. Po třiceći minutach so chowancy trenarja Franka Ričela pomału wuswobodźichu. Hosćo z Gery běchu wjele běhali a při tym tójšto mocow zhubili.

W druhim połčasu bě hra wurunana a Karel Vrabec postara so po róžku wo 1:0 (68.). Wotnětka so Wismutej hižo wjele njeporadźi a Stefan Höer a Alexander Schidun měještaj 2:0 na noze. Höer bě sam na wrotarja běžał a Schidun so dwaj metraj před wrotami z bulom kopolił. 2:0 třěli štwórć hodźiny do kónca Franz Häfner a 3:0 Eric Prentki z pomocu jědnatki (89.). Jörg Stephan

SJ Njebjelčicy

– Zeleno-běli Sepicy 3:0 (2:0)

Zestawa domjacych: Hahn – Hoelzel, Hanuza, Deleńk, Hrjehor, Kral, Čornak (77. Ričel), Lejnart, Haška, Schulze, Korjeńk (72. Domš)

W poslednjej domjacej hrě tohole lěta pokazachu koparjo Njebjelčanskeje SJ přeswědčiwy wukon. Wobaj cyłkaj běštej so na to dojednałoj, přewjesć partiju hižo zawčerawšim, njedźelu, a nic hakle, kaž předwidźane, 10. decembra. Hižo po wosom mjeńšinach móhła hra předrozsudźena być, ale Robert Lejnart smokny wótru třělwu snadnje nimo žerdźe (3.). Tež Stefanej Kralej ze zadnjeho rynka so pjeć mjeńšin pozdźišo 1:0 njeporadźi. Po hratej štwórć hodźinje zaklinka prěni raz w klětce hosći. Kral posłuži Lejnarta, a tón suny bul mudrje přez liniju. W 25. min. zwrěšći Handrij Korjeńk hišće před wrotarjom, sčini pak to w 39. min. po přihrawce kapitana Jurja Haški lěpje. Wuhra hóstneho wrotarja a sadźi kulowatu kožu k 2:0 do saka.

Wučerjo-volleyballisća Serbskeho gymnazija Budyšin (SGB) su 51. sezonu wokrjesnych mišterstwow při wysokim saku z dobyćomaj zahajili. Woni steja nětko na druhim městnje tabulki šěsć startowacych šulow hač k druhemu hrajnemu dnjej w měrcu 2018.

Po zakónčenju jubilejneje 50. sezony wokrjesnych mišterstwow pedagogow we volleyballu w meji je so nětko znowa šěsć cyłkow na prěnim hrajnym dnju w Lubiju wubědźowało. Hłowny orga­nizator turněra, wučer Dirk Beckert z Wyšeje šule Malešecy, powita w sportowni Lubijskeje Pestalozzijoweje šule nimo muskich kolegow tež dźesać volleyballistkow, štož jara zwjesela. Na třoch hrajnišćach zahajichu zahorići sportowcy najdlěši čas eksistowacy volleyballowy turněr Sakskeje, a to bjez sudnika. To je móžne a za wšitkich akterow při wysokim saku chwalbyhódne.