Sokoł Ralbicy/Hórki II – HZ Hórnikečanski jězor 1:5 (1:1)

Zestawa domjacych: Hrjehor – von Köding, Bogusz, M. Matka, Kobalc, Serbin (78. T. Matka), Bejma, Rawš, Čórlich (60. Šnajder), Kurjat, Jakubaš

Zestawa Sokoła Ralbicy/Hórki so za tónle hrajny dźeń dosć derje čita, wukon druheho połčasa pak dyrbiš so prawdźepodobnje jako katastrofu wopisować.

Na poziciju wrotarja wróćił je so młody Chrystof Hrjehor. Tež Alexander von Köding mustwo zaso zesylnja, a wón měješe so wo lěpše defensiwne dźěło starać. Sokoljo derje započachu a samowrota w 9. min. wunjesechu jim nawjedowanje, jako škitar bul wróćo hłójčkowaše a wrotarja z tym překwapi. Njetraješe pak dołho a znowa pokazachu domjacy koparjo kaž hižo tydźenja wulke słabosće w defensiwje. Hrać bjez libera jim w tutej lize prosće njeleži. W 17. min. ćehnješe hóstny nadběhowar dosrjedźa a jeho třělwa dyri do žerdźe. Hižo do toho mějachu Sokoljo zbožo, jako bě njezbožowna flanka łatu trjechiła. Krótko po tym dyrbješe Hrjehor dwójce zakročić a wotwobara bul k róžkej. Tón pak wunjese wurunanje, jako Preibsch bul z dźesać metrow do kuta sadźi.­