Sokoł Ralbicy/Hórki
– TSV 1920 Połčnica 5:0 (3:0)
Zestawa domjacych: Ch. Gloxyn – Matka, B. Bjeńš, Schultz (77. Zynda), Rawš, Šewc, S. Bjeńš, D. Gloxyn, Bejma, Korjeńk, Domaška
Po domjacej poražce přećiwo Kulowej a remisu w Großröhrsdorfje chcychu koparjo Sokoła Ralbicy/Hórki skónčnje zaso tři dypki žnjeć. W minjenymaj domjacymaj hromaj přećiwo Połčnicy bě so jim to tež z kanterowym dobyćom poradźiło. A tajke su wčera znowa swjećili, wšako steješe po 90 mjeńšinach 5:0 za hosćićela.
Po rjanej kombinaciji přez Dennyja Gloxyna, Tomaša Bejmu a Pětra Domašku docpěchu domjacy w 14 min. nawjedowanje. Nětko pak mějachu hosćo swojej najlěpšej móžnosći cyłeje partije. Najprjedy znješkódni Chrystof Gloxyn wólny kop z 25 metrow hišće na liniji, krótko na to dźěše bul snadnje pódla wrotow. Delanscy hrajerjo pak hru kontrolowachu a po poł hodźinje na 2:0 zwyšichu. Fabian Korjeńk běše po dalšej rjanej kombinaciji třělc. Jako so wšitcy hižo na połčas nastajichu, steješe znowa Korjeńk na prawym městnje a postara so wo předrozsudne 3:0 (41.).
