Fabmobil nominowany za Zwjazkowe myto za kulturne kubłanje
Budyšin (am/SN). Wot lońšeho oktobra je čorny dwuposchodowy bus Fabmobil tydźensce na dwór Serbskeho šulskeho a zetkawanskeho centruma w Budyšinje přijěł. A sakske ministerstwo za wědomosć a wuměłstwo je Fabmobil za Zwjazkowe myto za kulturne kubłanje namjetowało. Z dohromady 104 zapodatych projektow wupyta wone dźesać, z kotrychž chce tři po 20 000 eurach mytować. „Inwestujemy wjele mocy do projekta. Jara bych so nad mytom zwjeselił, dokelž móhli z pjenjezami bus dalše lěto financować“, rozkładuje sobuiniciator Fabmobila Bosćij Pjaca. „Popřał bych je tamnym wězo tež, wšako su woprawdźe dobre projekty nominowane.“ Tuchwilu dóstawa Fabmobil financnu podpěru Zwjazkoweje kulturneje załožby, kotraž pak w septembru wuběži. Nimo toho spěchuja jón dalše institucije, kaž sakske ministerstwo za wědomosć a wuměłstwo, Sakska kulturna załožba a załožba PwC. „Wjeselimy so nad kóždejžkuli pomocu. Naše durje pak steja wšitkim wopytowarjam dale šěroko wotewrjene“, Pjaca wuzběhnje.